Ecrã de busca

Numbers 11

Fa gin’en ni Taberah fithingan

1Me tabab piyu Israel i gun’gun’ ngak SOMOL ni bochan e gafgow ni yad be tay. Fa’ani rung’ag SOMOL me damumuw, me pag e nifiy nga fithik’ rad nge urfiy e gin ni be par yu Israel riy ni kirebnag taban u baley. 2Me wenig e girdi’ ngak Moses ni nge ayuwegrad; me meybil ngak SOMOL, me math fare nifiy. 3Min tunguy yu Taberah,+ ko gin’em, yu rom e bul e nifiy rok SOMOL riy u fithik’rad.

Moses ni mel’eg medlip i ragag e Tayugang’

4Pi’in gathi yad piyu Israel nra uned ngorad u Egypt e yad be yim’ ni bochan e ufin, miki un piyu Israel ko gun’gun’ ni be lungurad, “Manga yigi yag e ufin ngodad ngad ked! 5U Egypt e ud ked e nig riy ndariy puluwon, nge kiyuri, nge mayis, nge subuyas, nge garlik. 6Ma chiney e kem’ay gelngidad. Dariy ban’en ni ngad ked, kemus ni manna e gadad be kay ni gubin e rran.”

7(Re manna nem e bod nochi awoch, ni ba dake maguchol ra’en. 8Ma yan e girdi’ ni kakadbul ngar fanged ngar biliged ara ra yowogiliyed, miyad lith ngar ngongliyed e kek nib gilgith riy, bod lamen e kek ni kan lith ko gapgip ni olive.) 9Ra mulmul e wa’angachal ni nep’ ko gin be par piyu Israel riy, ma ke un e re manna nem ngay.

10Me rung’ag Moses lungun urngin e girdi’ ni yad be gun’gun’, nra reb e tabinaw ma ke mu’ulung e girdi’ riy nga langan e mab ko birorad e Tent. Me ri damumuw SOMOL ngorad. Me par Moses ni kari dabuy e ren’em, 11me ga’ar ngak SOMOL, “Mang ni kam gafgow nigeg? Mang e kug rin’ nde magan’um ngay ni er fan ni kam teg ni gag e nge mil fan urngin e pi girdi’ ney ngog? 12Gathi gag e gu sunumegrad ara gu gargelegrad! Ere mang ni kamog ngog ni nggu dinobiyrad ni bod be’ ni bpin ni be tathuthnag pifak mu gu fekrad i yan ko fare nam ni gur e mmicheg ngak pi chitamangirad ni kakrom ni bay mpi’ ngorad? 13U uw e nggu fek e ufin riy ni yad ra gaman riy ni ara’ urngirad? Kar gafgow niged gag ya yad be yor ngog ni nggu pi’ e ufin ngorad. 14Dabiyag ni nge mil fan e pi girdi’ ney ngog ni urngin, ya ban’en ni kayigi gel e mo’maw’ riy ngog! 15Fa’anra irera’ e n’en ni ngam rin’ ngog, me ere mu runguyeg ngam thang e pogofan rog nggu chuw ko gafgow.”

16Me ga’ar SOMOL ngak Moses, “Mu ulunguy medlip i ragag e pumo’on ni yad ma yog e thin rok yu Israel, mfekrad i yib ngog ko fare Tent u p’eowcheg, ma gog ngorad ni ngar sak’iygad u cherem. 17Ya bay gub nga but’ nggu welthin ngom u rom, ya bay gu fek boch e gonop ni kug pi’ ngom nggu pi’ ngorad. Miyad un ngom i ayuweg e pi girdi’ ney, me par ni gathi go’ gur e ke mil farad ngom. 18Nge lungum ngak e girdi’, “Ngam machalbog niged gimed ni fan ko gabul, ya bayi yag e ufin ngomed ni ngam ked. Ya SOMOL e ke rung’ag lammed ni gimed be yoer nibe lungmed manga yigi yag e ufin ngomed ma kabfel’ rogmed ni um pired u Egypt. Ere SOMOL e bayi pi’ e ufin ngomed ngam ked. 19Ma dabisiy ni ngam ked ni gathi kemus ni ta’reb ara l’agruw e rran, ara lal, ara ragag, ara reliw’ e rran, 20ya reb e pul ni ngam ked ngan chichingeg nga owchemed ni kam dabuyed gol’ochngin, ni bochan e kam pi’ed keru’med ngak SOMOL ni be par u fithik’med ma gimed be gun’gun’nag ma be lungumed a susun e dab mu chuwgad u Egypt.”

21Me ga’ar Moses ngak SOMOL, “Nel’ mir’ay e biyu’ e girdi’ ni gu be gafaliyrad, ere kamog ni bay mpi’ e ufin ngorad ni nap’rad reb e pul? 22Yira li’ e garbaw nge saf ma gur yad ra gaman riy? Gur yad ra gaman u urngin e nig ni bay u maday?”

23Me fulweg SOMOL ni ga’ar, “Gur bay ban’en ndabiyag rog? Daba’ e bay mu guy ko ra yib i m’ug nib riyul’ e tin kugog ngom fa dangay!”

24Me yib Moses nga wean me yog ngak e girdi’ e tin keyog SOMOL. Me ulunguy medlip i ragag e pumo’on ni yad ma yog e thin rok yu Israel ngarbad ra pired ni kar liyeged fare Tent. 25Me yib bangi manileng nga but’ ni bay SOMOL u fithik’ nge welthin ngak Moses. Me fek boch e gonop nike pi’ ngak Moses nge tay nga laniyan’ fa medlip i ragag i pumo’on ni yad ma yog e thin. Ma fa’ani yib e re gonop nem ngorad, miyad welthin ni bod rogon e profet, ni kemus e yay nra yodoromgad.

26L’agruw ko fa medlip i ragag i girdi’ ni yad ma yog e thin, ni aram Eldad nge Medad e ra pirew ko gin ni bay e pi Tent rok piyu Israel riy ma da ranow ko fare Tent. Mu rom ko gin ni yow bay riy e yib fare gonop riy nga lanin’row, mi yow welthin ni bod rogon e profet. 27Me mil ba pagel nge yan i weliy ngak Moses e n’en ni be rin’ Eldad nge Medad.

28Joshua ni fak Nun ni i ayuweg Moses ko ngiyal’ ni kab pagel ke mada’ ko ngiyal’nem e ga’ar ngak Moses, “Masta, mu talegrow!”

29Me ga’ar Moses ngak, “Mog, ke awan’um ngorow ni bochag? Ku gum’ ni bochan ni manga yigi pi’ SOMOL e gonop ngak urngin e girdi’ rok ngar welthingad ni bod rogon e profet.” 30Me sul Moses nge fa medlip i ragag i girdi’ nma yog e thin rok yu Israel ko fa gin yad be par riy e ngiyal’nem.

SOMOL ni pi’ e arche’ ni quail

31Me pi’ SOMOL bangi nifeng nge fek e arche’ ni quail u maday i yib, ni be changeg ni dalip e fit tolngin u daken e but’ ngalang. Ma ra bad ra pired ko gin nike n’uf yu Israel e pi Tent rorad riy ni kar suggad u rom i yan nga orel nib yo’or e mayel. 32Me maruwel e girdi’ e rofen nem ni polo’, nge reb e nep’ nge reb e rran riy ni polo’ ni yad be kol e arche’ ni quail; dariy be’ nib lich ko wugem e barril e arche’ ni kol. Miyad k’afeg e pi arche’ nem u but’ i yan ni nge fengfeng nike liyeg e gin’em ni yad be par riy. 33Ka nap’an e kabay e ufin u thilin nguwalenrad, ni dawor i yag ni ngan ful’, me damumuw SOMOL nge pi’ e msilipig nge yib ngorad. 34Min tunguy fithingan e gin’em ni Kibroth Hattaavah (ni fan e “Malangen e Yam’ ko Ar’ar”), ni bochan e aram e gin ni un k’eyag e pi’in ni ur ar ar niged e ufin riy.

35Miyad chuw u rom ngranod nga Hazeroth, miyad n’uf e pi Tent rorad u rom.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index