Ecrã de busca

Jelemiya 31

1«Kuzwa ciindi eeco, Mbwaamba Mwami Leza. Ndiyooba Leza waziinga zyoonse zyamu Isilayeli, abalo bayooba bantu bangu. 2Mboobu mbwaamba Mwami Leza ulati, ‹Kuli baabo bakafutuka munkondo ndakabafwida lweengelelo munkanda, Baisilayeli bakali kulangila kulyookezya.› 3Mwami Leza wakalibonya kulimbabo, kubantu bakwe wakati, ‹Ndakamuyanda akutamani, asunu ndicimuyandisisya.› 4Ndiyoomuyaka, aboobo muyooyakululwa omooye wangu Isilayeli. Kwamana muyoobweza nsakalala zyanu, muyoozyana cakutangala. 5Alimwi muyoosyanga myuunda yamisaansa, mumalundu aaku Samaliya, balimi bayoosyanga akulya micelo yabo. 6Buyoosika buzuba balindizi nibayooita atala aatulundu twa Efulemu kuti, ‹Amuboole tuye ku Ziyoni, ku Mwami Leza wesu.› »

7Mboobu mbwaamba Mwami Leza. «Amwiimbile Jakobo calutangalo,

amupozomoke mukulumbaizya mwami wamisyobo. Amucite kuti kulumbaizya kwanu kumvwigwe akuti,

‹O Mwami Leza wafutula bantu bako basyeede Baisilayeli.›

8Amubone, ndiyoobaleta kuzwa kucisi cakunyika, akubabungika kuzwa kumagolelo aanyika.

Akati kabo kuyooba balema aboofu, baminsi balaafwiifwi kutumbuka. Kuyooboola nkamu mpati.

9Bayooza kabalila, bayookomba ndaakubaleta. Njoobeenzya kumbali aatusensa twamaanzi,

akazila kabambasede cakuti tabakalifumpuli, nkaambo ndime wisi wa Isilayeli,

alimwi Efulemu ngomwanaangu mulombe mutaanzi.

10Amuswiilile jwi lya Mwami Leza, nobamasi amwaambilizye eezi kumanyika aali kulaale.

Ooyo wakamwaide Baisilayeli wababunganya alimwi akubalanga kabotu mbuli mweembezi mbwalanga butanga bwakwe.

11Nkaambo Mwami Leza wanununa Jakobo, akumuvuna kumaanza mayumu aainda nguwe.

12Bayooboola akuzooimba cakutangala atala aacilundu ca Ziyoni,

bayoobotelwa kuzipego zyangu, maila, waini amafuta aaoliva,

abana ba mbelele aŋombe. Bayooba mbuli muunda uutililwa kabotu, bayoojana zyoonse nzyobayanda.

13Basimbi bayoozyana akukondwa, balombe abamadaala abalo.

Ndiyoosandula kulila kukabe kutangala, ndiyoobaumbulizya akubatangazya kuleka kubaumbaazika.

14Ndiyoopa bapaizi zyakulya zinji, akuti bantu boonse kabakkuta. Mbwaamba Mwami Leza.»

Mwami Leza mbwayoolumbula Baisilayeli

15Mboobu mbwaamba Mwami Leza. «Koomoka kwakamvwigwa mu Lama,

kulila akweema kwabamatumbu kupati, nkokuti Lacelo ulila bana bakwe,

wakaka kuumbulizigwa, nkaambo bazimina.

16Mboobu mbwaamba Mwami Leza. ‹Amuleke kulila amusansamune misozi,›

nkaambo milimo yanu iyoolumbulwa, Mbwaamba Mwami Leza.

Bayoopilusigwa kuzwa kunyika yabasinkondonyina.

17Kuli lulangilo lwanu kumazuba aaboola.»

Mbwaamba Mwami Leza. Bana banu bayoopiluka kunyika yabo.

18«Ndakamvwa bantu Baisilayeli kabati cakulila, ‹Mwami Leza, twakali mbuli banyama batanatamba,

pele watwiisya kuswiilila, wakatuleta kulinduwe, aboobo twakapiluka.› Nkaambo nduwe Mwami Leza wesu.

19Twakalikufutatide, pele cakufwambaana twakayanda kupiluka.

Niwakamana kutusubula twakausa kwatulema kumakosi. Zyabukubusi bwesu zyakatujazya bweeme.

20«Sena Efulemu tali mwanaangu mulombe ngweyandisisya, mwanaangu uundikondelezya.

Nikuba kuti nkanza kumusubula, ndicimuyeeya. Nkaako moyo wangu ucisukeme.

Ndijisi lweetelelo lupati kulinguwe. Mbwaamba Mwami Leza.

21Ubikke mbaakani munzila, kuti uzoozibe mookaindide.

Amupiluke Nobaisilayeli kuminzi njimwakasiide.

22Ino cilalampa buti ciindi cakwiingaila, omwana musimbi uutakwe lusyomo?

Mwami Leza uyoolenga cintu cipya anyika aano, mukaintu nguuyoolangaula mwaalumi.»

23Mboobu mbwaamba Mwami Leza Singuzuzyoonse wa Isilayeli ulati, «Ndaakubapilusya kuzwa mubwaange, bantu bali munyika ya Juda aminzi yawo, bayoobelesya majwi aaya,

‹Mwami Leza aleleke cilundu ciluleme ca Jelusalemu,

busena busalala mbwakkala.›

24«Bantu boonse bayookkala antoomwe mucisi ca Juda, amuminzi yaco, balimi alimwi abeembezi. 25Ndiyookkutya bafwa nzala akubayumya. 26Nkaako bantu bayooti, ‹Ndakoona kabotu, ndabuka nkelimvwide.› »

27Mazuba ayoosika, «Mbwaamba Mwami Leza, neyoovuzya Isilayeli a Juda abana banji babantu ababanyama. 28Mbubonya mbwindakabalangilila, kubajwa, kubazapaula, kubanyonyoona akubaletela mapenzi, mbubonya oobo mbweyoobalangilila, kubayaka akubasimpa. Mbwaamba Mwami Leza. 29Ciindi eeco caakusika taakwe nibayooamba kuti, ‹Basikale bakalya zisaside, meno aabana abaabunyeele.› 30Mucilawo caceeci muntu uuli woonse uyoofwida cinyonyoono cakwe, ooyo uulya nsaansa zisaside, meno aakwe ayoobaabunyeele.»

Zyacizuminano cipya

31Mazuba ayoosika, mbwaamba Mwami Leza. «Nenjoocita cizuminano cipya, abantu Baisilayeli abantu ba Juda. 32Tacili cizuminano cili mbuli ncindakacita kuli bamawisi pe, ciindi nindakabasolweda kubagwisya mucisi ca Ijipiti. Tiibakabamba cizuminano cangu eeco. Nikuba kuti ndakali mbuli mulumi wabo, mbwaamba Mwami Leza. 33Lino nceeci cizuminano ncetipange abantu ba Isilayeli, mazuba aaza, mbwaamba Mwami Leza, njoobikka mulawo wangu mumizeezo yabo. Njooulemba mumyoyo yabo, njooba Leza wabo, abalo bayooba bantu bangu. 34Taakwe uuciyooiisya mweenzinyina. Taakwe uuciyooiisya munyina kuti azibe Mwami Leza. Boonse bayoondiziba lwabo beni, mwana amupati. Mbwaamba Mwami Leza. Njoobafwida luzyalo akulekelela zibi zyabo. Nsikaziyeeyi limbi zinyonyoono zyabo.»

35Mboobu mbwaamba Mwami Leza, ooyo wakabikka zuba kuti kalibala sikati,

wakalenga mwezi anyenyezi kuti kazimweka masiku, uuyuuntanya lwizi

kuti mayuwe kaavuuma, Mwami Leza Singuzuzyoonse ndizina lyakwe.

36Zilenge zyamunyika zyaakumana, mbwaamba Mwami Leza, ndendilyo musyobo wangu wa Isilayeli nuuyoomana.

37Mbubonya mbuli muntu mbwatakonzyi kupima majulu ambwatakonzyi

kuvuntauzya zyazicinda zyanyika mbubonya oobo mbwetakooyookaka balunyungu

lwa Isilayeli, akaambo kazeezi nzibakacita, Mbwaamba Mwami Leza.

38«Mazuba ayoosika, mbwaamba Mwami Leza, neyooyakulula munzi wa Jelusalemu kuzwa kuŋanda ndamfu yakusompelela ya Hananeli kuyoosika kumulyango wakucooko. 39Munyinza wawo uyootalikila kumbo mane do kucilundu ca Galebu waakunyonena ku Gowa. 40Kkuti lyoonse oomo muzikkilwa bafu atwe molisowelwa, amyuunda iili mukkuti lya Kidiloni kuyoosika kumulyango wamabbiza kujwe, buyooba busena busalala ku Mwami Leza. Munzi ooyu tuukamwaigwi limbi nikuba kuzyulwa nikuba kunyonyoonwa.»