Ecrã de busca

II SAMUELE 5

Davida o bewa morena wa setjhaba sohle. — O futuhela Bajebuse, mme o etsa Jerusalema motse wa moreneng. — O hlola Bafilesta.

1Yaba meloko yohle ya Iseraele e tla ho Davida, Hebrone, ba bolela, ba re: Bona, re masapo a hao le nama ya hao. 2Maoba le maobane, Saule haesale morena wa rona, e be e le wena ya futuhisang Baiseraele le ho ba orosetsa hae, le Jehova o kile a re ho wena: O tla disa setjhaba sa ka sa Iseraele, o be molaodi wa Iseraele. 3Baholo bohle ba Iseraele ba tla jwalo ho morena, Hebrone, mme morena Davida a hlaba selekane le bona Hebrone, pela Jehova, mme teng ba tlotsa Davida, hore e be morena wa Iseraele.

4Davida o ne a le dilemo tse mashome a mararo, ha a qala ho busa; mme a busa ka dilemo tse mashome a mane. 5A busa Juda, a le Hebrone, ka dilemo tse supileng tse nang le dikgwedi tse tsheletseng, mme a busa Iseraele kaofela le Juda ka dilemo tse mashome a mararo a metso e meraro, a le Jerusalema.

6Mohlang oo, morena le banna ba hae ba futuhela Jerusalema, ho ya lwantsha Bajebuse ba neng ba ahile fatsheng la teng. Bajebuse ba bolella Davida, ba re: O ke ke wa kena kwano; esita le difofu le dihole di ka o leleka. E be e le ho re, Davida a ke ke a kena teng. 7Leha ho le jwalo, Davida a kena qhobosheane ya Sione; ke wona motse wa Davida. 8Davida a re tsatsing leo: Ya tla qhala Bajebuse, a be a fihle forong ya metsi ho dihole le difofu tse hloilweng ke pelo ya Davida, o tla hlohonolofala. Ke ka baka leo ho thweng: Difofu le dihole ke tseo, a ke ke a kena hae ha tsona.

9Davida a aha qhobosheaneng, mme a e rea lebitso la motse wa Davida. Davida a haha le lerako le teelang qhobosheane hare, le tlohang Millo, ho ya fihla hare. 10Davida a nna a ya a hola, mme Jehova, Modimo wa makgotla, a nna a ba le yena.

11Le yena Hirame, morena wa Tire, a romela Davida manqosa, le difate tsa dikedare, le dibetli tsa difate, le dibetli tsa majwe; tsa hahela Davida ntlo. 12Davida a tseba kahoo hoba Jehova o mo tiisitse ho ba morena wa Iseraele, le hobane o phahamisitse borena ba hae ka baka le setjhaba sa hae sa Iseraele.

13Jwale Davida, hobane a tlohe Hebrone, a eketsa a nka direthe le basadi Jerusalema; Davida a boela a tswallwa bara le baradi. 14Ke ana mabitso a ba tswaletsweng yena a le Jerusalema: Ke Shammua, le Shobabe, le Nathane, le Salomone; 15le Jibhare, le Elishua, le Nefege, le Jafia; 16le Elishama, le Eliada, le Elifelethe.

17Bafilesta ha ba utlwa hore Davida o tlotsitswe ho ba morena wa Iseraele, ba futuha bohle ho ya lwantsha Davida; mme Davida ha a utlwa, a kena qhobosheaneng. 18Bafilesta ha ba fihla, ba rasa kgohlong ya Barefaime. 19Ebile Davida a botsa Jehova, a re: Na ke tla nyolohela mo lwantsha Bafilesta? Na o tla ba neela matsohong a ka na? Jehova a re ho Davida: Nyoloha, hobane ruri ke tla neela Bafilesta matsohong a hao. 20Yaba Davida o ya Baale-Peratsime, mme Davida a ba qhala teng, a re: Jehova o entse sekgeo direng tsa ka, jwalokaha metsi a ka etsa sekgeo. Ka baka leo, lebitso la teng le bitswa Baale-Peratsime (thota ya dikgeo). 21Teng, Bafilesta ba lahla le ditshwantsho tsa medimo ya bona, mme Davida le banna ba hae ba ya le tsona.

22Bafilesta ba boela ba futuha hape, ba rasa kgohlong ya Barefaime. 23Davida ha a botsa Jehova, Jehova a re: O se ke wa ya pontsheng; o ba pote kamorao, mme o ba seeletse maloka le difate tsa monokotswai. 24Etlere ha o utlwa modumo wa diqi dintlheng tsa difate tsa monokotswai, o ke o ba nehelle; hobane etlaba Jehova o se a o eteletse pele, ho ya qhala makgotla a Bafilesta. 25Davida a etsa jwalokaha Jehova a mo laetse, mme a qhala Bafilesta, ho tloha Gibea, ho ya fihla Gesere.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index