Ecrã de busca

NA VUNAU NI SORO 4

Ai soro ni valavala ca ni sa vakacalaka na bete, 1-12, se nai soqosoqo taucoko, 13-21, se na turaga, 22-26, se na tamata lailai, 27-35.

1A sa vosa vei Mosese ko Jiova, ka kaya, 2Mo vosa vei ira na Isireli, ka kaya, Kevaka sa cala e dua na tamata, ni sa cakava e dua na ka sa vakarota ko Jiova me kakua ni caka, ia sa cakava e na lecava: 3kevaka sa vakacalaka na bete sa lumuti me vakacalai ira kina na tamata; me qai vakacabora vei Jiova, e na vuku ni nonai valavala ca sa cala kina ko koya, e dua na luve ni pulumokau sa sega na kena ca, mei soro ni valavala ca. 4Ia me kauta na pulumokau ki na mata i Jiova, ki na katuba ni vale ni veitavaki; ka tabaka na ulu ni pulumokau e na ligana, ka vakamatea na pulumokau e na mata i Jiova. 5Ia na bete sa lumuti me taura e dua na dra ni pulumokau, ka kauta ki na vale ni veitavaki: 6me qai tonia na nonai qaqalo na bete e na dra, ka kureitaka vakavitu na dra e na mata i Jiova, e na mata ni lati ni vale tabu. 7Ia na bete me sa boroya na tutuna balavu cake ni cabocabo ni kau boi vinaka me vakamai, sa tu e na mata i Jiova, e na vale ni veitavaki; ka sova yani na dra kecega ni pulumokau ki na vu ni cabocabo-ni-soro kama, mai na katuba ni vale ni veitavaki. 8Ia me kauta laivi na uro kecega ni pulumokau sai soro ni valavala ca; a uro sa ubia na gacagaca, kei na uro kecega sa tu e na gacagaca, 9kei na ivi ruarua, kei na uro sa tu kina, mai na sarisarina, kei nai latikoso sa toka e cake ka toka era na yate, kei na ivi, o koya me na kauta tani, 10me vaka sa kau laivi mai na pulumokau sa cabo mei madrali ni veivinakati: ia me vakama oqo na bete e na dela ni cabocabo-ni-soro kama. 11Ia na kuli ni pulumokau, kei na lewena kecega, kei na uluna, kei na yavana, kei na kena gacagaca, kei na dena, 12io na pulumokau taucoko, me colati yani ki nai bili ni tikotiko ki na vanua savasava, sa dausova biu kina na dravusa, ka me vakamai e na bukawaqa e dela ni buka eso; e na tikina sa dausova biu kina na dravusa, me vakamai kina.

13Ia kevaka era vakacalaka nai soqosoqo taucoko ni Isireli, a ra sa lecava na kena cala nai soqosoqo, a ra sa kitaka eso na ka sa vakarota ko Jiova me kakua ni caka, a ra sa cala kina; 14ni sa kilai na ka era sa cala kina, me ra qai cabora e dua na luve ni pulumokau ko ira nai soqosoqo mei soro ni nodra cala, ka kauta ki na mata ni vale ni veitavaki. 15Ia ko ira na qase vei ira nai soqosoqo, me ra tabaka na ulu ni pulumokau e na ligadra e na mata i Jiova: me qai vakamatei na pulumokau e na mata i Jiova. 16Ia na bete sa lumuti me kauta e dua na dra ni pulumokau ki na vale ni veitavaki; 17ka me qai tonia na nonai qaqalo na bete e na dra, ka kureitaka vakavitu e na mata i Jiova, e na mata ni lati. 18Me boroya talega e na dra na tutuna sa balavu cake e nai cabocabo-ni-soro sa tu e na mata i Jiova, e na vale ni veitavaki; ka sova biuta na dra kecega ki na vu ni cabocabo-ni-soro kama, ka tu mai na katuba ni vale ni veitavaki. 19Ia me kauta laivi na kena uro, ka vakama e na dela ni cabocabo-ni-soro. 20Ia me kitaka vua na pulumokau me vaka ka kitaka eliu vua na pulumokau sai soro ni valavala ca, io me vakakina oqo: ia me sorovaki ira na bete, era na qai sega ni cudruvi kina. 21Ia me colati yani na pulumokau ki nai bili ni tikotiko, ka vakamai me vaka sa vakamai na pulumokau ka liu: oqo nai soro ni nodra vakacalaka nai soqosoqo.

22Ni sa vakacalaka e dua na turaga, ka sa cakava e na lecava e dua na ka sa vakatabuya ko Jiova na nona Kalou, a sa cala kina; 23kevaka sa vakatakilai vua emuri na nona cala; me qai kauta mai ko koya na nonai madrali, a me tagane sa sega na kena ca: 24ia me tabaka na ulu ni me e na ligana, ka vakamatea e na tikina sa dauvakamatei kina nai soro kama e na mata i Jiova: oqo nai soro ni valavala ca. 25Ia me kauta ko koya na bete e dua na dra ni soro ni valavala ca e na nonai qaqalo, ka boroya kina na tutuna sa balavu cake e nai cabocabo-ni-soro kama; ka sova biuta na dra ki na vu ni cabocabo-ni-soro kama. 26Me qai vakama na kena uro kecega e na dela ni cabocabo-ni-soro, me vaka sa cabori na uro ni madrali ni veivinakati: me sorovaki koya kina na bete e na vuku ni nonai valavala ca, ena qai sega ni cudruvi kina.

27Ia kevaka sa vakacalaka e dua na lewe ni vanua, ka kitaka e dua na ka sa vakatabuya ko Jiova, a sa cala kina; 28kevaka sa vakatakilai vua emuri na nonai valavala ca sa cakava oti ko koya: me qai kauta mai e dua na me me nonai madrali, na ka yalewa sa sega na kena ca, e na vuku ni nona cala sa cala kina ko koya. 29Ia me tabaka ko koya na ulu ni soro ni valavala ca e na ligana, ka vakamatea nai soro ni valavala ca e na tikina sa daucabori kina nai soro kama. 30Ia me kauta ko koya na bete e dua na kena dra e na nonai qaqalo, ka boroya kina na tutuna sa balavu cake e nai cabocabo-ni-soro kama; ka sova biuta na kena dra kecega ki na vu ni cabocabo-ni-soro. 31Ia me na kauta laivi na kena uro kecega, me vaka sa kau laivi na uro mai nai madrali ni veivinakati; ia me vakama ko koya na bete e na dela ni cabocabo-ni-soro me ka boi vinaka vei Jiova; ia ena sorovaki koya na bete, ena qai sega ni cudruvi kina ko koya.

32Ia kevaka sa kauta mai na nonai madrali, e dua na lami mei soro ni valavala ca, me kauta mai e dua na ka yalewa sa sega na kena ca. 33Ia me tabaka ko koya na ulu ni soro ni valavala ca e na ligana, ka vakamatea e na tikina sa dauvakamatei kina nai soro kama, mei soro ni valavala ca. 34Ia me kauta e dua na dra ni soro ni valavala ca na bete e na nonai qaqalo, ka boroya kina na tutuna sa balavu cake e nai cabocabo-ni-soro kama, ka sova biuta na kena dra kecega ki na vu ni cabocabo-ni-soro: 35me qai kauta laivi na kena uro kecega, me vaka sa kau laivi na uro ni lami mai nai madrali ni veivinakati sa cabori; me qai vakama e na dela ni cabocabo-ni-soro ko koya na bete, me vaka sa daucaka e na ka sa cabori e na bukawaqa vei Jiova: ia me sorovaki koya na bete e na vuku ni nonai valavala ca sa cakava, ena qai sega ni cudruvi kina ko koya.

Vakavakadewa Makawa

©1974 Bible Society of the South Pacific

More Info | Version Index