Ecrã de busca

Lukas 23

Jesus kotjipala tjaPilatus

(Mat. 27:1-2,11-14; Mark. 15:1-5; Joh. 18:28-38)

1Engundwa alihe lyovantu lya kulama, hali twala Jesus kuPilatus. 2Wo va uta oku mu pa onkali, hava tyaa: “Nguka twe mu mono ama pukitha otjiwan̯a tjetu, ma tjaele okuyandja elilimo komukesari, ye me litya oMessias, ohamba.”

3Pilatus we mu pula ha tyaa: “Oove ohamba yOvajuda?”

Jesus wa yaka ha tyaa: “Iinga, otjo ngahi wa popi.”

4Iya Pilatus wa heela ovayambethi ovanene nowingi wovantu ha tyaa: “Ame hí lwete mo onkali momuntu hengu.”

5Iya wo va tetha vala ombata hava tyaa: “Ma hongaetha ovantu nelongo lye okudha koGalilea nomoJudea atjihe katee hempa.”

Jesus ma koyelwa kotjipala tjaHerodes

6Iya Pilatus hiee tji tee, wa pula omulumentu ngoka andaa Omugalilea. 7Hiaa tee okutya owomotjilongo tjaHerodes, we mu tuma kuHerodes, mena lyokutya naye wo wa li moJerusalem potembu hendjinya.

8Herodes hiaa mono Jesus, we hulukwa unene, mena lyokutya nalukulu nahi u hala oku mu mona, mena lyokutya we mu tyaa ae, u hala okumona otjilingatangan̯eko himatji ningwa kuJesus. 9We mu pulapula ovipuka ovingi, atjaa Jesus ke mu yakele. 10Ovayambethi novalongiveta va kulama, have mu pa onkali unene nodhonkono. 11Iya Herodes novakwavita ve ve mu tomba, have mu penye. Ve mu dhaleka omudhalo omunene mbumau laima, have mu tjun̯a kuPilatus. 12Etango lyatjo ndyoka Herodes naPilatus otjo ve lihava oupanga, mena lyokutya lukulu pokati kawo pa li ovita.

Jesus ma koyelwa et̯o

(Mat. 27:15-26; Mark. 15:6-15; Joh. 18:39—19:16)

13Pilatus wa ithanena pamo ovayambethi ovanene novanene wotjilongo novantu vamo, 14he ve heele ha tyaa: “Mwa eta omuntu hengu kwaame, mwa tya omutyolethi wovantu, napano mbe mu pula movipathi vyen̯i, iya muye hí mwene mo onkali nokanunu ndjimamu mu koyele. 15NaHerodes ke mu mwene onkali, iya we mu tjun̯a kunt̯e. Omulumentu hengu ke na tja hiaa ningi himatji mu dhipaetha. 16Me mu tonetha, ndji mu yethe.”

17[Pomatango otjipito tjOpaasa Pilatus ovantu u ve kutululila onkwatwa imo ndjimava hala.]

18Ovantu avehe va wololoka hava tyaa: “Nga dhipawe, ove u tu kutululile Barabas.” 19Barabas wa yedhililwa mokaliwoso mena lyotjipopya hiaa li natjo motjitungwalongo moka, nomena lyokudhipaa.

20Pilatus wa li ama hala okukutulula Jesus, he ve ithana uke a popye nawo. 21Iya wo va wololoka vala hava tyaa: “Mu papela komutjaakano, mu papela komutjaakano!”

22Iya Pilatus wa popya nawo otjikando otjityatatu ha tyaa: “Omena lyatji, ouvi mbwaa ningi owatji? Ame hí mwene mo onkali yokut̯a muye. Me mu tonetha, ndji mu yethe.”

23Iya wo va hapa ko vala okuwololoka unene, have mu pula okutya Jesus nga papelwe komutjaakano. Okuwololoka kwawo kwa teeka. 24Iya Pilatus wa tokola okuhwithila po himava hala. 25Wa kutulula ngoka nguva li amava hala, ngwaa li mokaliwoso mena lyotjipopya nomena lyokudhipaa, iya ha yandja Jesus, a ningwe ngahi mava hala.

Jesus ma papelwa komutjaakano

(Mat. 27:32-44; Mark. 15:21-32; Joh. 19:17-27)

26Ovakwavita va ya naJesus. Mondjila va kambula Simon Omukireni, ngwaa li ama dhi kotjana, have mu twike omutjaakano, e u tjinde, otjo ma landula muJesus.

27Engundwa lyovantu lye mu landula. Mokati kawo mwa li wo ovakadhintu mboka mbave mu lila otjo mava yayana. 28Jesus wa pilulukila kuwo, ha tyaa: “Vakadhona vaJerusalem, hámu ndili, lililen̯i, n̯e mu lile ovanwen̯i, 29mena lyokutya omatango mae ya, katango ovantu mava ka tyaa: ‘Ovanalao odhompange, mbahave lipele omienyo nambahava yamethele.’ 30Ovantu mava ka uta okuheela odhondundu hava tyaa: ‘Tu wilen̯i,’ hava heele ovilukonko hava tyaa: ‘Tu tjikilen̯i.’ 31Iya omuti omutalala andaa mau ningwa nyahika, omukukutu mau ningwa vi?”

32Ovalumentu vamo vavali, mbava li odhomputji va twalwa pamo naJesus va ka dhipawe.

33Iya hive thiki koluvedhe nduu tiwa Otjoolotwe, Jesus ve mu papela komutjaakano, pamo nodhomputji ndhoka, imo okokulyo nonkwawo okokumbinda kwe.34Iya Jesus ha tyaa: “Taa, ve ithila po, mena lyokutya kave tji i himava ningi.”

Iya ve liyandjela omidhalo vye, amava undapetha otjiholowoletho. 35Ovantu va kulama mpoka, have mu tala, iya ovatumini nawo wo ve mu penya, hava tyaa: “Nahi oye a hupitha ovantu, nge lihupithe ye omwene, andaa oye e li Messias, omuholowolwa waKalunga.”

36Ovakwavita nawo wo ve ya, hava penye Jesus. Ve mu nwitha ovinyu mbyaa lula,37hava tyaa: “Ove andaa uhamba yOvajuda, lihupitha iya ove omwene.”

38Kombanda yomutwe kwa li esoneko ndyaa sonekelwe hinyahi: “Hengu Ohamba yOvajuda.”

39Umo owomodhomputji ndhaa papelwa komutjaakano, we mu penya ha tyaa: “Haove Messias? Lihupitha iya ove omwene, ove u tu hupithe.”

40Iya omukwawo we mu anda, ha tyaa: “Ku tila Kalunga, hiuu li mekoyo ndii lithike polye? 41Nt̯e twa koyelwa mouvyuuki movipuka mbitwa ninga, iya hengu ka ningile ouvi watja nokanunu.”

42Iya wa heela Jesus ha tyaa: “Jesus, nt̯ipaluka ndje, himo thiki motjilongo tjoye.”

43Jesus we mu heela ha tyaa: “Otjatjili me ku heele okutya ndino hendi mo ka kala pamo naame mOparadisa.”

Okut̯a kwaJesus

(Mat. 27:45-56; Mark. 15:33-41; Joh. 19:28-30)

44Iya owola omulongo nambali yokomutenya kwe ya et̯iku motjilongo atjihe, lyo hali kala ko katee owola ontyatatu yokomutenya, 45mena lyokutya etango lya li alya dhiwele. Otjitopa hitji yuvikila motempeli tja tauka pokati. 46Jesus wa wololoka peulu ha tyaa: “Taa, omwenyo wandje me u yandja momawoko oye.” Hiaa popi nyahi, tjau ha t̯i.

47Iya omunene wovakwavita hiaa mono soka hitja ningwa, wa tumbaleka Kalunga, ha tyaa: “Omuntu hengu otjatjili wa li omuvyuuki.”

48Ovantu avehe mboka mbava onganene ko okutala, hiva mono soka hitja ningwa, va tjuna kodhonganda ave ihamenwa. 49Ovatjitwa avehe vaJesus novakadhintu hembenya mbave mu landula okudha koGalilea, va kulama kokule, hava tala ovipuka mbyoka.

Jesus ma pakwa

(Mat. 27:57-61; Mark. 15:42-47; Joh. 19:38-42)

50Kwa li omulumentu nguu tiwa oJosef, owomOtjoongi tjOvanene. Omulumentu hengu wa li omuwa, omuvyuuki, 51owomoArimatia, ondolopa yOvajuda, nguu kevelela otjilongo tjaKalunga. Josef etokolo lyOtjoongi novilinga vyawo ke vi itavelele.

52Wa ya kuPilatus, ha kumbu otjivimbi tjaJesus.

53Hiee tji itha ko, we tji dhingila motjitopa tjoliina, he mu paka mombila ndjaa hokolelwe mewe, moka muhamuya pakwa omuntu noumo. 54Etango ndyoka lya li olyokulilongekedha, Esabati lya li amali utu.

55Ovakadhintu mbenya mbava dhile naJesus koGalilea, va landula Josef, hava tala ombila notjivimbi tjaJesus okutya ma pakwa vi. 56Iya hiva tjuna kodhonganda, va ka longekedha ovidhimba nomadhi.

Iya mEsabati va thuva, ngahi tja hewa moveta.

Etestamende Epe Moludhimba

© 2012 Bible Society of Namibia

More Info | Version Index