Ecrã de busca

Matthew 15

Hengov an Henavogyon

Mark 7:1-23

1Ena Fariseow ha skribys a Yerusalem a dheuth dhe Yesu ow leverel, 2‘Prag y hwra dha dhyskyblon kammdremena erbynn hengov an henavogyon? Rag ny wolghons aga diwla pan dhebrons bara.’+ 3Ev a worthybis ow leverel dhedha, ‘Ha hwi ynwedh, prag y hwrewgh kammdremena erbynn gorhemmynn Duw der agas hengov hwi? 4Rag Duw a leveris, “Enor dha das ha'th vamm”, ha “Neb a villikko y das po y vamm, bedhes gorrys dhe'n mernans.” 5Mes hwi a lever, Piwpynag a lavarro dh'y das po dh'y vamm, “Pypynag a gaffes dhiworthiv yw ro sakrys”, 6nyns yw ev synsys dhe enora y das na'y vamm;+ ha hwi a dhile ger Duw der agas hengov. 7Hwi falswesyon, yn ta y profoesas Ysay ahanowgh, ow leverel,

8“An bobel ma a'm enor gans aga diwweus,

mes pell yw aga holonn dhiworthiv;

9hag yn euver i a'm gordh,

ow tyski avel dyskas gorhemmynnow tus.” ’

10Ha wosa ev dhe elwel an routh dhodho, yn-medh ev dhedha, ‘Klewewgh ha konvedhewgh; 11Nyns yw an dra hag a wra mos a-bervedh y'n ganow a dhefol den, mes an dra hag a dheu yn-mes a'y anow – henna a wra defola den.’ 12Ena an dhyskyblon a dheuth ha leverel dhodho, ‘A wodhesta bos an Fariseow sklandrys ow klewes an lavar na?’ 13Ev a worthybis ow leverel, ‘Pub losowenn na wrug ow Thas a nev hy flansa a vydh diwreydhys. 14Gesewgh i dhe vos; hembrenkysi dhall yns i a dus dhall.+ Mar kwra den dall hembronk den dall, i aga dew a goedh yn kleudh.’ 15Peder a worthybis, ow leverel dhodho, ‘Styr dhyn an barabolenn ma.’ 16Ev a leveris, ‘Owgh hwi hwath heb konvedhes, hwi ynwedh? 17A ny gonvedhowgh bos pup-tra a enter a-bervedh y'n ganow ow tremena dhe'n golodhyon hag ena yw tewlys yn-mes y'n kawghti? 18Mes an taklow a dheu yn-mes a'n ganow a dheu dhiworth an golonn ha henna a wra defola den. 19Rag dhiworth an golonn y teu drokprederow: denladh, avoutri, dijastita, ladrans, fals dhustuni ha blasfemi. 20An re ma a wra defola den; mes dybri heb golghi diwla ny wra defola den.’

Fydh an Venyn Gananek

Mark 7:24-30

21Ha Yesu ow mones alena a omdennas dhe rannvro Tyr ha Sidon. 22Hag awotta, benyn gananek a dheuth a'n oryon na ha garma, ‘Arloedh, mab Davydh, kemmer truedh ahanav; ow myrgh re beu dalghennys yn trog gans dyowl.’ 23Mes ev ny's gorthybis ger vyth. Ha'y dhyskyblon a dheuth dhodho orth y bysi ha leverel, ‘Gwra hy dannvon yn-kerdh, rag yma hi ow karma war agan lergh.’ 24Mes ev a worthybis, ow leverel, ‘Ny veuv vy dannvenys saw dhe dheves kellys chi Ysrael.’ 25Mes hi a dheuth ha plegya dhe'n dor a-dheragdho, ow leverel, ‘Arloedh, gweres vy.’ 26Mes ev a worthybis, ow leverel, ‘Nyns yw gwiw kemmeres bara an fleghes ha'y dewlel dhe'n keun.’ 27Yn-medh hi, ‘Ya, Arloedh, rag ynwedh an keun a dheber an brewyon koedhys dhiworth moes aga mestrysi.’ 28Ena Yesu a worthybis, ow leverel dhedha, ‘A venyn, meur yw dha fydh; bedhes dhis kepar dell vynnydh.’ Ha'y myrgh a veu yaghhes a'n keth eur na.

Yaghheans Lies Den

29Ha pan dremenas alena, Yesu a dheuth ryb mor Galile, ha wosa yskynna an menydh ev a esedhas ena. 30Hag y teuth dhodho routhow bras ha gansa tus evredhek, dall, mans, avlavar ha lies huni arall, hag i a's gorras dhe'n leur orth y dreys ev, hag ev a's yaghhas. 31Ytho an routh a's teva marth pan welsons an re avlavar ow kewsel, an dus vans yn yagh, ha'n evredhyon ow kerdhes ha'n dhellyon ow kweles; hag i a wormolas Duw Ysrael.

Maga an Peswar Mil

Mark 8:1-10

32Ena Yesu a elwis dhodho y dhyskyblon ha leverel, ‘Yma truedh dhymm a'n routh, rag i dhe vos genev nans yw tri dydh ha nyns eus gansa travyth dhe dhybri; ny vynnav aga dannvon yn-kerdh heb dybri, ma na glamderrons war an fordh.’ 33Ha'n dhyskyblon a leveris dhodho, ‘A by le kevyn bara lowr y'n gwylvos may hyllyn maga routh mar vras?’ 34Ha Yesu a leveris dhedha, ‘Py lies torth eus genowgh?’ Yn-medhons, ‘Seyth, ha nebes puskes byghan.’ 35Hag ev a erghis dhe'n routh esedha war an leur, 36ha wosa ev dhe gemmeres an seyth torth ha'n puskes, ev a ros gras ha'ga therri, ha'ga ri dhe'n dhyskyblon, ha'n dhyskyblon dhe'n routhow. 37Ha peub a dhybris hag a veu lenwys, hag i a guntellas remenant an brewyon, seyth kanstellas leun. 38Ha'n re a dhybris o peswar mil wour, heb rekna benynes ha fleghes. 39Ena ev a dhannvonas an routhow yn-kerdh ha mones a-bervedh y'n gorhel ha mos yn oryon Magadan.+

An Bibel Kernewek 2018

© Kesva an Taves Kernewek 2004, 2018

© Cornish Language Board 2004, 2018

More Info | Version Index