Ecrã de busca

Ebavevuvu 44

Vei siliva baiki wagaine.

1Ada kani ke yuga giavaina, Yosefa ginau yana manuwa anatoitaveyabina giveimeyena, givona, “Taidei kaliva-dina seyana seyana yana baiki una vemagana, aa ginawai anafaiweya. Ada kaliva seyana seyana yana siliva una dodona yana baiki awana wagaine. 2Ada kaduwe akuvei siliva ani kwamaneya-mowa yana baiki wagaine una dodona, aku yana siliva witi fatana faina nodi.” Ada togugaiyavo aditonagona gigugai Yosefa givonena mamauwe.

3Mala gilavuna malabutuya-mwaeya Yosefa yana togugaiyavo ani tubuiyanavo iimilidi ke wayadi donikiyavo nodi itauya. 4E ada kaliva-dina melala lakaina isegena, ada keke idana atuwada aku Yosefa yana togugai-nai givonena, “Unamadu tayuwe kaliva-dina unamadu venegadi, ada tova-nai una nuabidi aga una vonediga, ‘Ime adewa iwakana wagaimiya aku gavana faina wagugai koyona wagaimeya? 5Gavana faina yaku kauveya anavei siliva wakiyafu? Tainei vei-nai wavaina ani wagaine giyuyuga, kaduwe wagaine aimo gavadi ina yegemo faidiya giawamogataledi. Ida dewa koyona wagugaiyena.’”

6Ada togugai-nai gitauya ginau ke ginuabidi, ada vona-dina giluvagiledi wagaidiya, 7aku ivonenaga, “Kauveya, gavana faina tainei anafaiweya uvonavona? Keke meyameyaganina dewa tainei anafaiweya anagugaiye! 8Ualamanena tainei siliva-dina anuwagadi yama baiki awadiya ani ayewedi wagainiya Kenani-deya, ani nonogana ya kauveya yana siliva o kai gola adakiyafudi yana manuweya. 9Kai wagaimeya seyana gaito una nuwagana vei-nai givaina, aga kaliva-nai gilubodana ginaalika, ada kaduwe matatabuma ana vetogugai yogoyogona wagaimiya.”

10Ada togugai-nai gilufata givonaga, “Ina iwakana. Kanagugai wavona anafaiweya aku banae gaito vei givaina, banae gagana yaku togugai yogoyogona, aku matatabumi yavuyavumiyavo wananau.”

11E ada kaliva seyana seyana maduga-mowa yana baiki giseobuyena babi wagaine ada seyana seyana awana giyavuna. 12Ada togugai-nai lele givevuvuna tomoinagona wagaine-deya ke gina giluyabu kwamaneya wagaine ani vei-nai ginuwagana Beniyamina yana baiki wagaine.13Ada vei siliva iitana, au adinuya ikelilidi faina nuwadi givita lakaina. Ada yadi baiki iabulakalakata doniki tabodiya ke iyewadi melala lakaina wagaine.

14Aku Yosefa aimo yana manuweya gimiyamiya ani Yuda tubuiyanavo nodi ielai wagaine, ada matane taudiyavo ibatugedi wamagigidiya babi wagaine. 15Ada Yosefa gitolidadanedi, givona, “Gavana vuvuna taidei anafaiweya wadewa? Maita waalamanena kaliva anafaiweya iyayeku, akufaiweya gaitoma sewasewavuyedi gana alamanedi, iyaiyaya ke avaita wagaidiya?”

16Ada Yuda gilufata, givonaga, “Kauveya, gavana meyameyaganina anavona? Gavaiyamu taumeyavo ana vewaleni vaita ime keke koyona adagai? Yaubada bademowa yama koyona giyavumatatabuyena. Ada malinai ime matatabu-moema ana vetogugai yogoyogona wagainiya, anafaiweya taumeyavo ada banae gaito inuwagana vei-nai givaina nodi.”

17Aku Yosefa givona, “Keke, keke meyameyaganina tainei anafaiweya ganadewa. Banae gaito wagaine vei-nai inuwagana, anakaibe gagana yaku togugai yogoyogona. Aku moyaimi kukuyeya wanayewa tamami wagaine.”

Yuda yana veola Beniyamina faine.

18E ada Yuda ginau Yosefa wagaine ada givonaga, “O, yaku kauveya, meyameyaganina iya ya togugai uda awaegeku kabisona gadaifufu wagainiya. Ya veimeya anatoyogina anafaiweya Felo, aku keke nuwa ginakoyo wagaikuya. 19Yaku kauveya, nagona aela vaguvagu idedeku ani utolidadanema, uvona, ‘Tamami gimiyamiya ada tamo tubuiyami?’ 20Ada alufata, avonaga, ‘Tamama gimiyamiya, bademowa givesilakai, aku yana vesilakai wagaine natuna kaliva givetubuna. Kwamana-nai tawagana gialika aku banae anakaibe-mowa gitufo inana natudiyavo wagaidiya, ada tamana ginunuwakabubuyena lakaina.’ 21E ada ime ya togugaiyavo uvonema, ‘Taimi-nai wanaobu-aliye gana itana.’ 22Ada avoneniga, ‘Kauveya, wada kwamana-nai keke maita tamana gida segesege. Kai gina-maduyabuyabuna aga tamana ginaalika.’ 23Aku ime ya togugaiyavo uvonema, uvonaga, ‘Kai taimi kwamaneya keke nodi wana obuela, aga keke magigiku wanaita-vagile.’

24“E ada ayewama ya togugai kamaku wagaine ada aifufuyena gavana uvona mamauwe. 25Ada tamama givonaga, ‘Wadayewa adaga maita wada kimone,’ 26aku avonaga, ‘Keke amafaiweya anaobu. Kai taima kwamaneya una awaege nodi ananau, tainei iwakana. Faina kaliva-nai aimo keke meyameyaganina magigina anaita kai taima keke nodi.’

27“E ada ya togugai kamaku givonema, ‘Bademowa waalamanena vavineku Litiyeli natukuweyavo kaliva adiselu ivetubudi. 28Ada seyana bademowa gisege-vagaiku, ada wada velemoena kevakeva walawalaa ikudabwakebwakeina, ada tova tayuwe wagaine gielai malinai keke maita gadaitaita. 29Ada kai kaduwe taimi wanaabi wana nauwena ada waiya tamo vita gina yegemo wagaine, aga yaku nuwavita wagaine ada ganaalika ganaobu didikuleya.’ 30E ada malinai gavana gina yegemona kai anayewama tamama wagaine aku taima keke nodi? Banae gaitoma lakai-vagaina tamama yawaina wagaine. 31Tova-nai tamama kwamana-nai gina italelena ada kai keke gina itanuwaga aga ginaalika. E ada ya togugaiyavo yama koyona faina, tamama nuwavita wagaine ginaalika ginaobu didikuleya. 32Kaduwe, iya ya togugai gavonadabadaba kamaku wagaine vaita kwamana gana itaveyabi-dewedewena. Gavonenaga, ‘Kai keke kwamana ganayewe-aliye, aga tainei yaku koyona mataniya yawaiku matatabuna wagaine.’

33“Taidei vuvu-dina faidiya, gaveoleni, auwe kwamana uda awaege tawaganavo nodi idayewa, aku iya gada fatana ke gada vetogugai yogoyogona wagainiya. 34Keke akufaiweya gana yewaku kamaku wagaine kai keke kwamana nodi, aenanai gana itana koyo-moena gina yegemona kamaku wagaine.”

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index