Ecrã de busca

NLAÑANE BÔT 14

Bôt ba bene nyiin e Kanaan

(Nlb 13:27-33; Dt 1:25-40; Nk 32:9-14; Nlb 32:7-13; Sam 106:24-26)

1Ane bôte bese be nga bete metyiñ a yôn; be nga yône ngum alu ôte ôse. 2Bone bʼIsraél bese be nga kobô Môze a Aron *abé menyiñ a jô be na: Amu jé bi nji ke wu e si yʼEjipte, nge wu e *nkôte si! 3Amu jé Nti a kañese na bi nyiine si éte a wu a nkpwaté mekôn? E binga bangan, a bone bangan ba ye bo biôme ya nsa. Ye e nji bo mvaé mfaʼa wongane na, bi bulan Ejipte? 4Nde môt ase a nga jô nyô mboʼo na: Ntelaʼan évet, bi bulan Ejipte.

5Ane Môze a Aron be nga ku mesu me butu si ôsu ékôane bôt ése ya bone bʼIsraél. 6Wôna Yasua e mone Nun a Kaleb e mone Yefuné, bôte ya nsamba ô nga ke looé si, be nga nyabe mengômesane map 7a kobô ékôane bôt ése na: E si bi nga wulu a looé, é ne angôndô ya étua mbamba si. 8Nge Nti a yene bia mvaé, wôna a ye bo na bi nyiine si éte a a ye ve bia je; si e vôme menyañ a wôé bia len. 9Ve da, te kôlan e ngame Nti, nalé fe te koone bôte ya si éte woñ; amu be ne bia avalʼane bidi, jôme ya kame be é nji fe bo a Nti a ntoo e ngame jangan, te koone be woñ.

10Ve ngume nsamba ôse ô nga jô na be lume be *mekok. Atemeteme na étôtoʼo Nti é nga faé e mise me bone bʼIsraél, e *nda éndelé bendôbaʼan été.

Môze a sili *njaman asu ayoñ ése

11Ane Nti a nga jô Môze na: Ye bôte ba ba ye foʼo jôʼé mbenan ba bene ma? Ye ba ye ke ôsu a bo te tabe ma ndi akôsa bo mendem mese me litiya ézezañe jap? 12Ma ye bibi a jiane be a ébubua ôkon, a éyoñe te ma ye bo na ayoñ da dañe ngu a abui a lôte Israél e bialé be wo. 13Eyoñe te Môze a nga yalane Nti na: Bôte yʼEjipte be nga yeme na, ô nga vaa bôte ba e be be a ngu. 14Be nga kañete de bôte ya Kanaan, be kik be yemeya na, wo Nti wo wulu bôte ya ayoñe dôé, a na wo yené e be be, ntebe zañe momo; ba yeme na, wo wo kamane be, amu wo wulu ôsu viap e nsume *nkut a amôs, e nsume nduan a alu. 15Nge wo mane jiane bôte bôé éyoñe jia, meyoñe bikule mese me nga wôʼôtan e mam mese ô nga bo ma ye jô na: 16Nti a nji ke bo nguleya wulu e bôte ba a kui be e si a nga kaʼa be; amu ajô te nde a maneya wôé be e *nkôte si. 17Ajô te ma yeʼelane wo, a Nti, na ô kulu e ngule jôé. Boʼok avale ô nga tuʼa kate bia na: 18Me ne Nti, nyô a yeme jibi a *mvam abui, ma yeme jibi *abé mevale meva, ma yeme fe jibi melo mevale meva. Ve me nji nyoñe môt a bili mekua ane nyô a nji bi étom; *abé ya môt a bo melebe yʼété ma tôñ e mvoñe bôte jé a kui e miaé lale, nge miaé nyini. a 19Ajô te a Nti, amu ô ne avale mbamba fulu te, tame beta jamé *abé ya bôte bôé, avale ô zuya wo jamé be, ataté éyoñ be nga kôlô Ejipte. 20Nde Nti a nga yalane nye na, me jaméya avale wo te sili. 21Ve ane e ne bebela na me vee, a na, étôtoʼo jam ja yiane *si nyô ése, 22e bôte bese be nga yen étôtoʼo jam a mendem me nga bo Ejipte a e *nkôte si, a mbe be bôbeleya ma biyoñ awôm, a be nji ke vôʼôlô tyiñe jam, b 23bese ba ye bo teke yene si me nga kane bʼésaa ngana na ma ye ve be: ba bese be nga soñe ma ba ye bo teke yene je. 24A amu mbo ésaé wom Kaleb a nga bili avale *nsisim afe, a amu a nga tuʼa tôñ e zene jam, ma ye bo na a nyiin e si a nga ke, a e mvoñe bôte jé ja ye nyoñe si éte. 25Bôte ya Amalék a e ba ya Kanaan be too e mbiʼili; a akiti ma ye bulane mvus a tôñe zene ya *nkôte si e mfaʼa ya évele mañ.

Nti a yaa bôte ya ayoñe dé

26Ane Nti a nga beta jô Môze ba Aron na: 27Me wôʼôya ane bone bʼIsraél ba kobô ma *abé menyiñ. Nté avé ba ye ke ôsu a bo nalé? 28Kele jôane be na: Ma, Nti a vee, ma kobô ne ngeññ na, ma ye bo mia avalʼane mejô me nga wôʼô mi kobôʼô me né: 29mia ye mane wu e *nkôte si wu. E mia bese mi nga lañeban, mi too mimbu mewôm mebaé a a lôte valé, mia ye wu amu mia kobô ma *abé menyiñ. 30Ma kane de ngana na, mia ye bo te nyiin e si me nga tiñeti mia na, mia ye tabe. Kaléb e mone Yefuné a Yasua e mone Nun étam mbe ba ye nyiin été. 31Ve mfaʼa ya bone benan, ba mi nga jô be na ba ye bo jôme ya nsa e be besiñe benan, ma ye nyiñeli be e si mi nga biasé, a ba ye yeme je. 32Ve mia, mia ye wu e *nkôte si wu, 33ve bone benan ba ye baʼale mimbame miap tañe mimbu mewôm menyin. Ba ye beʼe e mam ma tôñ ékotekote jenan, akekui mia ye mane wu bese e *nkôte si. 34Mi nga looé si melu mewôm menyin, ve mia ye tôbane minjuʼu ya *abé denan tañe mimbu mewôm-menyin. Môs ôse wo ye veʼane ngume mbu. Eyoñe te mia ye yem jôm é ne na, me ne mia e ngame yat. 35E jame ma Nti ma kate mia, nde le. A ma kate mia bebela na, ma ye bo mia avale me jôya, mia, ayoñe bôt e ne adite ya beʼe a mi maneya tebe ma e ngame yat: ajô te mia ye mane wu e *nkôte si môte wua teke liʼi.

36Ajô te ba bese Môze a nga lôme na be looé si, mbe bete a mebulan, be nga kobô nkobô ya biasé si éte a tindi fe bôte na be kobô Môze *abé, 37be nga mane wu; Nti a nga bibi be a ébubua, amu nkobô *abé be nga kobô si éte. 38Yasua a Kaléb étam mbe be nga liʼi ézezañe ya bôte bete.

Bôte ba beta bo ébiasé

39Eyoñe te Môze a nga zu kate bone bʼIsraél mejô mese Nti a nga kobô. Nde be nga dañe yaa. 40Ajô te, e ndibe tyé, be nga ke e si minkô be jôʼô na: Bi ne mekua! Vʼéyoñe ji bi ne nkômesane ya ke e vôme Nti a nga jôô nye. 41Môze a nga sili be na: Jé mia bo ji? Mia bo abendé Nti melo. Mi se nguleya yene mvaé! 42Nti a nji bo mia ngam; ajô te te keane na besiñe benan be bôme mia. 43Bôte ya Amalék a ba ya Kanaan be ne wé, ôsu vienan; mia ye mane wôéban e mewosane zañ. Amu mi maneya kandane Nti, nde Nye fe aa ye ke bo e ngame jenan. 44Ve ayoʼo dab été, bone bʼIsraél be nga jeñe na be ke e si minkô. Ve Môze a nga liʼi e minkan, nalé fe éwolo é nʼétyi, ndeme ya élate Nti. 45Bôte ya Amalék a ba ya Kanaan be nga sis be soʼo minkô e vôm be nga too, nde be nga bôme bone bʼIsraél a titane be a kui Orma.

Bible en langue Bulu

© LʼAlliance Biblique du Cameroun, 2007

More Info | Version Index