Ecrã de busca

Maka 5

Yesu Inganga So Sadi Ye Tool Atu

(Matiu 8:28-34; Luka 8:26-39)

1Yesu iye di galiunu tipie a tisiutu ran le la pombe ran koonoo kapala ye tana kidi Gerasa.+ 2Le nga ye kene yo iye di galiunu be tipas ke ookoo pono a tidi pang tana nga, ngan tool atu yo so sadi tiyepe ye i, in palbe leu be ipas ye agoro kidi matenge a ipot le pot itauaraii. 3-4Ngan tool tani in iyepe agoro lono ke di matenge, inbe muku ngan tipau kene le baene ye ooroo medana, bong gurana san le ikupkuprai ooroo medana tina, inbe igoromkat so medana yo tikapidi kene ye nga. Ngan nen le nookoot nga tool sa yo gurana ke be iparama a ipauu mulu inbe iwete silli, ngan tiap. 5Le ye ke le bong tina yo kanakana nga, ngan ipa ye agoro kidi matenge le ni yo arono nga, inbe isululu a ikoropalapala tinini ye pat.

6Ye kene tani in ikamata Yesu ipa ni mooloo go, inbe idada a ila le la imol du igun turunu Yesu kene punu. 7-8Motong la Yesu iwete pang so sadi tani nen, “Ong in so sadi, le kupas a kusi tana ye tool in!”

Le nga tool tani in koonoo le mai nen, “Atoo! Yesu, ong i Maro yo iyepe ete ni, in natunu! Nga soo so be kuyeii pau i? Kupamede betanga ye Maro ene pau nen, be kin kop masngana pau be.”

9Motong la Yesu itoru nen, “Ong i em sei?”

Le nga iraua betanga ke Yesu nen, “Au i ek la Budanga i, yesoo am nga alunu.” 10Motong la tool tani in itor tootoo Yesu a imangmang ye be kin inganga di a tikoo ye ni tani be.

11Ye kene tani ngan di ga budanga mai atu tiyepe potai a tikanen kawal madini. 12Le nga di so sadi tina titoro Yesu a timangmang ye nen, “Ai, kungangam a amla ye di ga ngo, inbe kumalum pam a amdewe a amlo lodi.” 13Motong la Yesu imalum pang di a tipas ye tool tani a tisi tana, inbe tila la tidewe a tilo di ga tina ngan lodi. Le nga di ga tina ngan tidada a tila sakar matana a tipas du ran lono le taun tidadup a timmata. Ngan di ga tina ngan kinkatingi kidi ben 2,000.

14Motong la di tooltool yo matadi kala di ga nga, ngan tikamata so yo pombe i, le nga tikoo a tidada lo tikaua bingi ye malala mai kidi, inbe ye malala kapala yo iken potai ye, ngan lapau. Le nga di tooltool timadit a tidu be du tikamata soo so yo pombe i. 15Tidu du pombe, ngan tikamata tool tani yo muku ngan di so sadi alunu tidiwidiwoo i, in kuton kaua urata dook mulu, inbe isousou ye sousoungu a iwurur. Ngan nen le titattadai. 16Motong la di tooltool tina yo tikamata so yo pombe ye tool tani in nga, ngan tigasa pang di tooltool tina, inbe tiwete pang di ye so yo pombe ye di ga tina, ngan lapau. 17Le nga di tooltool tina ngan timadit a tiwete pang Yesu a timangmang ye be ikoo ye ni kidi inbe ila pang ni san.

18Motong la Yesu imulu be du iyiri lo ookoo pono a iye di galiunu timulu a tila, ngan tool tani yo so sadi idiwidiwoo i, in itoru a imangmang ye be imalum panga a nen ngan iye tila. 19Bong ngan Yesu imalum panga tiap. Iyei ne, “Kumulu a kulo malala kiong lo kuwete pang di sokam ye so maiyoko yo Tool Mai iyeii pong i, inbe ye dada yo lono pong a le ilonong ye i.” 20Motong la tool tani in imulu a ilo pang tana yo ene Dekapolis+ i, a lo igasa pang di tooltool ye so tina le imot yo Yesu iyei panga nga. Ngan nen le di tooltool le imot yo tilongo betanga ki nga, ngan titakrai.

Yesu Ikarata Garup Yo Iyolo Rara I, Inbe Ipamaditi Garup Kase Yo Imata I

(Matiu 9:18-26; Luka 8:40-56)

21Yesu iye di galiunu tikaua ookoo a tisiutu ran mulu a tila ke koonoo kapala. Le nga ye kene yo tila tisolo ye in nga, ngan le di tooltool alunu kaiye la timan tigaua le tigaliuu ran koonoo nga. 22Motong la tool atu yo ene Yairus in ipa a idu. Ngan ya in kuto mai atu yo iye di diene matadi kala rumu kidi Yuda ke gaongo i. Le nga ye kene yo du ikamata Yesu ye in nga, ngan le iro du igun turunu potai pang kene punu, 23inbe itoru a imangmang ye nen. Iyei ne, “Ai, natuk garup kase ni ngo be imata. Le atoo, kuman a ayong tadi rumu kiau di kupaloko baem lo pono, a be nen ngan tinini dook mata mulu a iyepe.” 24Motong la Yesu itoo a be yaru tidi pang rumu ki.

Ngan le di tooltool malala mai tina ngan titoo di lapau, bong tigaliuu le tiparlokoloko. 25Inbe garup atu yo iyolo rara ye rai sangaul be ru i, in ya lapau iye di tooltool tina tipa. 26Ngan garup tani, in muku ngan ikamata di tooltool ke bar alunu kaiye be tiloni ye matamatenge ki, ngan tiloni dook tiap, inbe tikap masngana mai panga. Inbe ya in ikatte pat ki le imot be iyimi urata kidi lapau, bong di atu sa ke be iloni a tinini dook mata mulu nga tiap, bong tiyeii a matamatenge ki tani in idik le lo maiyoko. 27-28Ngan tina ilongo bingi ke Yesu ye so yo iyei nga, ngan le lon tar nen, “Kumata le be atoko sousoungu ki leu nga, ngan ole matamatenge kiau imot le tinik dook mata mulu.” Motong la ipalanai di tooltool malala mai tina, inbe ipa ke Yesu murini le isulmaia baene la itoko sousoungu matolene ki. 29Motong le pattu leu be iyetai ben rara mooloo yo ikauu, in imot, inbe tinini dook mata mulu oo.

30Inbe Yesu lapau palbe leu be iyetai ben gurana ki kasin ilungmaii oo. Le nga iportak pang ye di tooltool malala mai tina, inbe itor di nen, “Ai, sei itoko sousoungu kiau i?”

31Le nga di galiunu tiwete panga nen, “Kumata, di tooltool malala mai la tigaliu ong le tiparlokoloko nga. E nga yelei be kutor ye tool yo itokong in nga?”

32Bong ngan Yesu matan sarsarai be ikamata tool yo iyei dada nen i. 33Motong la garup tani in lon galanga ye so yo pombe pang ye nga, le nga itattadai a itangarur, inbe ila tina le la igun turunu du Yesu kene punu, inbe ipapos so le imot yo pombe pang ye nga. 34Motong la Yesu iwete panga nen, “Natuk, lo medana kiong yo kutaru pau i, in la ikaratong le tinim dook mata mulu i. Le kula ngan le la kuyepe ye lo silene ke Maro, yesoo matamatenge kiong in imot oo.”

35Yesu iwetewete pang garup tani in go, inbe di tooltool pattu tipa ye rumu ke Yairus a pot pombe. Le nga tiwete pang Yairus nen, “Atoo, natum garup in imata oo. Le kin kuporo pannoongoo in be idi mulu be.”

36Di tooltool tina ngan tiwete nen, bong ngan Yesu lono be itar talngana ye betanga kidi yo tiweta, in tiap. Le nga iwete pang tool kuto mai yo matan kala rumu kidi Yuda ke gaongo in nen, “Kin kutattadai be, bong kuparama lo medana yo kutaru pau in le imede.”

37Motong la ikodokala di tooltool malala mai tina be kin sa titoo be. Le nga ikaua Pita inbe Yemis iye taini Yowan leu a iye di tidi. 38Tidi pombe ye rumu ke tool kuto mai tani, ngan Yesu ikamata di tooltool yo tiwou aisor, inbe titang le titit a tipadingi ni nga. 39Motong la idewe a ilo rumu lono lo iwete pang di nen, “Ai, nga yelei katangtang a kapadingi ni nen nga? Kase mai tiap in imata tiap, bong iken mata leu.” 40Ngan di tooltool tina ngan tilongo yo Yesu iwete nen nga, le nga tingeleraii.

Motong la inganga di le imot a tidu tana, inbe ikaua kase tani in tamana le tinana, inbe di galiunu yo tiye di tidi nga, ngan leu la tiye tilo ye rumu lono yo kase tani in iken ye i. 41Tilo rumu lono tani, motong la itoko baene inbe iwete panga nen, “Talita kum!” Ngan betanga nga punu nen, “Garup mitiap, awete pong nen, kumadit!” 42Motong la pattu leu be garup kase tani in imadit le lo ikodo a ipa. Ngan garup kase tani in rai ki sangaul be ru leu. Inbe di tooltool tina yo tikamata so yo pombe panga nga, ngan titakrai welewele. 43Bong Yesu iwetekala di nen. Iyei ne, “Kin kawete pang di tooltool kapala ye so yo pombe i be.” Motong la iwete pang garup kase tani in tamana le tinana be tikap so panga a ikan nga.

Rau Ke Maro

© Wycliffe Bible Translators, Inc. All rights reserved

More Info | Version Index