Ecrã de busca

Luka 4

Satan Itouo Yesu

(Matiu 4:1-11; Maka 1:12-13)

1Maro Amunu Silene ipapono Yesu, motong la iyege ran Yodan, inbe imulu a ila. Ngan Maro Amunu Silene ipasongosonga be ipa pang ye ni sorrakene atu. 2Ngan Yesu ya taleu ila iyepe ye ni sorrakene tani ye ke sangaul pai, inbe tool kuto mai kidi so sadi iman a man itoua. + Ngan ye ke tina yo Yesu iyepe ye nga, ngan ikan touo so pitiap le nga pitolo welewele.

3Motong la tool kuto mai kidi so sadi iwete panga nen, “Ai, be ong i Maro natunu moolmool nga, ngan kuwete a pat i iportak le iyei porong a koni.”

4Bong Yesu iraua betanga ki nen, “Rau ke Maro iwete nen, ‘Porong leu la be itoko di tooltool ye yepongo kidi, in tiap.’ -

5Motong la tool kuto mai kidi so sadi tani in ikaua Yesu a yaru tilo kawal kutono lo ipatnai so matana matana ke tana i le imot nga, ngan panga. 6Motong la iwete pang Yesu nen, “Au i ole akaua gurana mai pong be kuyei tool ene mai a matam kala so matana matana tina ke tana i le imot. So tina nga le imot, nga so kiau. Le sei tool lok be akap panga nga, ngan ole akap panga. 7Ngan kumata be kusung pau nga, ngan ole akap so tina nga le imot pong.”

8Bong ngan Yesu iraua betanga ki nen, “Rau ke Maro iwete nen, ‘Kusung pang Maro yo Tool Mai kiong i, inbe kuraua panga ya taleu.’-  ”

9Motong la tool kuto mai kidi so sadi tani in ikaua Yesu a yaru tilo pang Yerusalem, a lo ipatokode le ikodo bareme mai ke sungunu pono meneng ete ni, inbe iwete panga nen, “Be ong i Maro natunu moolmool nga, ngan kupas ni le kudu tana ni, 10yesoo Rau ke Maro iwete nen, ‘Ole iwanga di bangabangana ki si matadi kalong dook mata. 11Ole tisipong ye baedi, a be nen ngan pat isolo kem katene be.’ -

12Motong la Yesu iraua betanga ki nen, “Rau ke Maro iwete nen, ‘Kin kuyei dada dook tiap yo be kutouo Maro yo Tool Mai kiong, in be.’ -

13Tool kuto mai kidi so sadi itouo Yesu ye dada matana matana, ngan tiap. Motong la ikoo ye Yesu, inbe inam ye kene san mulu.

Yesu Ipamaditi Urata Ki Tana Mai Galili

(Matiu 4:12-17; Maka 1:14-15)

14Motong Maro Amunu Silene ipamede Yesu le gurana, inbe imulu a ila pang tana mai Galili. Ngan bingi ke Yesu tani in ipa le ingaua tana mai Galili le imot a di tooltool le imot tilonga. 15Inbe kanakana ngan ole ilo rumu kidi Yuda ke gaongo in lono, lo ipatomonai di tooltool. Ngan le di tooltool tina ngan le imot tiyitmaka ene.

Di Tooltool Ke Malala Nasaret Tikap Malmal Pang Yesu

(Matiu 13:53-58; Maka 6:1-6)

16Motong Yesu ipa mulu a ila pang ye malala mai Nasaret, ye ni tani yo ya kase ngan iyepe le lo ya mai ye i. Le nga ye lal kidi Yuda ke sungunu in pombe, ngan ilo rumu kidi Yuda ke gaongo in lono, ben tina yo iyei kanakana nga. Ilo lo ikodo dama, inbe ikinkata betanga yo iken ye Rau ke Maro in pang di tooltool. 17Motong la tikaua rau ke Maro koonoo yo Esai in panga. Le nga be iperenaii ngan ipuske betanga yo iken ye rau tani in iwete nen,

18“Tool Mai Amunu si iyepe yau,

yesoo ya taunu ipootau be akaua bingi dook mata pang di tooltool yo ballingadi tiap nga.

Inbe iwangau be si awete pang di tooltool yo tiyepe rumu dook tiap kidi talnga dikidiki lono nga,

ngan be tipas a tisi tana;

inbe akarata di tooltool yo mata kis nga,

a be nen ngan matadi rere mulu;

inbe alon di tooltool yo diedi tiyei di dook tiap a tikaua urata moonoo dook tiap pang di nga,

a be nen ngan tisolo urata moonoo dook tiap tani in mulu be.

19Inbe iwangau be si akaua bingi pang di tooltool nen,

be nookoot nga i lal ke Tool Mai yo be si iyei urata dook mata pang di tooltool ye i.”-

20Motong la Yesu ilulu rau tani mulu, inbe ipamule pang tool yo matan kala rau i, inbe du iwur. Le nga di tooltool tina yo tiyepe rumu ke gaongo tani in lono nga, ngan matadi kenen ye. 21Motong la iwete pang di nen, “Betanga ke Maro yo iken ye rau ki a kalonga i, in nookoot katai nga kanono pombe moolmool.”

22Di tooltool tina tilongo betanga dook mata yo iwete nga, le titakrai ye, inbe tiyitmaka ene. Bong ngan di tapdi tipartortor a tiyei ne, “Ai, tool i Yosep natunu, too? E nga yelei be le iwete betanga nen nga?”

23Ngan nen le Yesu iwete pang di nen, “Ang nga lok galanga yang be ole kakatte betanga atu pau ye betanga kidi maimai kiang yo muku ngan tiweta i. Ole kayei ne, ‘Tool ke bar be nen ngan ong taum kukaratong ngan.’ Ngan ole kawete pau be ayei mos sa ye malala kiau tauk i a be kakamata, dawa ben mos yo kalongo ayei pang di tooltool ke Kapenam nga.”

24Motong la Yesu iwete pang di mulu nen, “Awete pang moolmool nen, tool yo Maro koonoo i ke be di tooltool ke malala ki tilongo betanga ki tiap. 25Kapalongo, muku ngan ye lal yo ke Ilia i, ngan di garup tap ke Isrel alunu kaiye la tiyepe nga. Ngan ye kene tani, in ke kan le ki imol tiap ye rai tol inbe taudu limi be atu, le pitolo mai pombe ye tana maimai nga le imot. 26Bong Maro iwanga Ilia pang ye di garup tap yo tiyepe Isrel, ngan siap. Bong iwanga a ilo pang ye garup tap yo iyepe Serepat potai pang ye malala mai Saidon i. 27Inbe kene san, ye lal ke Maro koonoo yo Ilisa in nga, ngan di tooltool alunu ke Isrel la botoboto medana in ikan di nga. Bong di tooltool tina yo ke Isrel ngan sa tinini dook mata mulu tiap. Bong Naiman ataleu ke tana mai san Siria in la tinini dook mata mulu i.”

28Yesu iwete nen le di tooltool le imot yo tiyepe rumu ke gaongo tani a tilongo betanga ki nga, ngan katedi malmal dook tiap. 29Inbe timadit tina le tinganga Yesu be ikoo ye malala mai tani a idu diki. Motong la tikauu a tilo ye arono matana yo tikarata malala mai ye i, a be nen ngan tikauu a tikatte du ke madini ye ni yo dook tiap i. 30Bong Yesu ipa le ipalanai di tooltool budanga mai tina ngan a ila.

Yesu Inganga So Sadi Ye Tool Atu

(Maka 1:21-28)

31Motong la Yesu idu iyepe ye malala mai Kapenam yo iken ye tana mai Galili i. Le nga lal kidi Yuda ke sungunu pombe, ngan Yesu ilo ye rumu kidi Yuda ke gaongo, inbe ipatomonai di tooltool. 32Ngan le di Yuda tina titakrai ye patomonaingi ki, yesoo betanga ki ipa ye gurana ke Maro.

33Inbe ye kene tani, in tool atu iyepe ye rumu ke gaongo tani, bong tool tani in so sadi iyepe ye. Le so sadi idiwidiwoo le nga koonoo le somai. Iyei ne, 34“Atoo! Yesu ke Nasaret, ngan soo so be kuyeii pam i? Nga kuman be man kugarungam, too? Au i lok galanga yong oo, ong in Tool Tani Yo Maro Ipootoo Panga Ya Taunu I.”

35Motong la Yesu ipasak pang so sadi tani a iwete katkat panga. Iyei ne, “Ai, kuwetewete dookoot! Kupas ye tool in a kusi tana!” Motong la so sadi ikatte tool tani du tana sila dama kidi tooltool tina, inbe ipas a ikoo, bong igarungu tiap.

36Ngan nen le di tooltool tina tikamata le nga titakrai, inbe tiwete pang di diedi nen, “Ona tiap! I soo patomonaingi nen i na? Patomonaingi ki ipa ye gurana mai san, le ipas le iwete leu, inbe di so sadi tilongo betanga ki a tikoo!” 37Le nga bingi ke so tina yo Yesu iyei nga, ngan ipa a ingaua tana mai i le imot.

Yesu Ikarata Di Tooltool Alunu Yo Matamatenge Ikap Di Nga

(Matiu 8:14-17; Maka 1:29-34)

38Yesu imadit a iyege rumu kidi Yuda ke gaongo tani, inbe ipa a ilo pang ye rumu ke Simon. Ngan Simon roonoo garup in matamatenge ikauu le tinin yes mai san. Le nga titoro Yesu be iloni. 39Motong Yesu la ikodo le iture pang ye, inbe ipasak pang matamatenge be ikoo ye garup tani, ngan le matamatenge tani in ikoo ye. Motong la palbe leu be garup tani imadit a ikarata kaningi pang di be tikan.

40Tiyepe a pang rrai, ngan di tooltool yo matamatenge mai ikap di nga, ngan di sokadi tiyau di a tilo pang ye Yesu. Motong la Yesu ipaloko baene lo di tooltool tina ngan di atu atu podi, le matamatenge kidi imot inbe tinidi dook mata mulu. 41Inbe di so sadi tina yo inganga di ye di tooltool nga, ngan tipas a tikoo ye di, inbe koodi le mai nen, “Ong in Maro natunu!” Ngan tiwete nen, yesoo di ngan lodi galanga ye be ya in Kirisi. Bong ngan Yesu ipasak pang di, inbe ilele di be tiwetewete be.

Yesu Ipa Pang Ye Malala Maimai Kapala

(Maka 1:35-39)

42Muntu bong mai koot, inbe Yesu imadit tina ngan le ipa pang ye ni yo taukan tooltool i. Motong la di tooltool timadit a nga tisere. Le nga tisere a tipuske, motong la tiwete panga be ipa be, bong be sila iye di tiyepe. 43Bong ngan iwete pang di nen, “Au i, Maro iwangau be si apa be araia bingi dook mata ke dada yo Maro be matan kala di tooltool ki ye i, in pang di malala kapala lapau. Yesoo, ye punu naii la Maro iwangau a asi ye i.” 44Ngan nen le ipa ye tana mai Yudia le imot, inbe ilo rumu kidi Yuda ke gaongo a lo iraia bingi dook mata pang di tooltool a tilonga.

Rau Ke Maro

© Wycliffe Bible Translators, Inc. All rights reserved

More Info | Version Index