Ecrã de busca

Luka 22

Yuta Ipamede Betanga Be Ole Itara Yesu La Di Tooltool Kuto Maimai Baedi

(Matiu 26:14-16; Maka 14:10-11)

1Lal maiyoko kidi Yuda yo be tikana porong yo taukan so be iyeii a isung i, inbe lodi tut ye Paskimoolooningi ke Maro i, in nookoot nga iman potai oo. 2Ye kene tani in di tooltool maimai ke paroranga so pang Maro tiye di pannoongoo ke ger ke Maro nga, ngan ke be tikaua Yesu mallangana ye di tooltool tina ngan matadi tiap, yesoo titattadai di. Le nga tigaua, inbe tisere dada yo be tikauu a tiparama, a be nen ngan tiraumate le imata ye i. 3Motong la tool dook tiap Satan, in idiwidiwi Yuta yo tikiui ene san ye Iskariot i, in lono. Ngan Yuta tani, in Yesu di galiunu tina yo sangaul be ru nga, ngan atu kidi. 4Motong la Yuta tani in ilo ikamata di tooltool maimai ke paroranga so pang Maro nga, ngan tiye di tooltool kuto maimai yo matadi kala di bianga yo tikodo kala bareme mai ke sungunu nga, a be lo iye di tiwetewete, inbe tikarata betanga ye dada yo be itara Yesu tani in la baedi ye i. 5Ngan tilongo tina yo iwete nen nga le lodi ponana dook, motong la tigaua lodi be ole tikap pat pattu panga. 6Le nga Yuta tani in lono dook mata ye betanga kidi le la inam, inbe lon kaua urata ye lal nangai dook mata ke be di tooltool malala mai tina ngan tiyepe tiap, inbe itara Yesu la baedi nga.

Yesu Iwanga Di Galiunu Ru Be La Tipare Kaningi

(Matiu 26:17-25; Maka 14:12-21; Yowan 13:21-30)

7Motong la lal maiyoko tani kidi Yuda yo be tikana porong yo taukan so be iyei a isung i, inbe lodi tut ye Paskimoolooningi ke Maro, in pombe. + Le nga ye kene tani in, ngan ole di Yuda tina be tiraumata asara yo ene sipsip in natunu a be tiyei paroranga ye a tikan ye lal ke Paskimoolooningi tani. 8Motong la Yesu iwanga Pita ye Yowan be yaru timuku la tipare kaningi pang di. Le nga iwete pang di nen, “Suru, nga ole angru kamuku a kala la kapare kaningi paidi yo be takan ye lal ke Paskimoolooningi ke Maro i nga.”

9Motong la yaru titoro Yesu nen, “Ni nangai lom be la ampare kaningi tina ngan ye i?”

10Motong la Yesu iwete pang di yaru nen, “Kumata be angru kapa le lo pombe malala mai tani in lono nga, ngan ole tamoto atu yo ikooroo ran bor somai in itauarai ang dada. Ngan katoo a kaye kalo pang ye rumu yo be lo idewoo i. 11Ngan kalo, lo ngan be katoro rumu taunu nen, ‘Pannoongoo kiam iwete be man amtorong nen: Rumu lono yo kukarata panga be se iye di galiunu tiyepe ye, inbe tikana kaningi ke Paskimoolooningi ke Maro ye i, in la nangai i?’ 12Ngan ole rumu taunu tani in ipatnaia rumu lono somai atu yo iken ke ete i, in pang. Ngan rumu lono tani in tikarata kookoowoo ke burungu le ke kaningi so ye oo. Lo ngan be angru kalo lo kapare kaningi nango.”

13Motong la di galiunu ru tina ngan tiyege di a tilo nga, ngan le lo tikamata so tina le imot ngan pombe ben tina yo Yesu iwete pang di ye nga. Motong la yaru tipare kaningi yo be tikan ye lal ke Paskimoolooningi ke Maro nga.

Yesu Ikap Porong Le Ran Pang Di Galiunu

(Matiu 26:26-30; Maka 14:22-26; 1 Korin 11:23-25)

14Ngan lal ke kaningi so pombe, le nga Yesu iye di aposol ki tina ngan lo tiwur le tiwakaia kookoowoo yo ke kaningi so i. 15Motong la Yesu iwete pang di aposol ki tina ngan nen, “Au i lok dook mata san be le ayang takana kaningi ke Paskimoolooningi ke Maro i, muku ngan, lo ngan be asolo urata moonoo dook tiap ke masngana kooti. 16Awete pang nen, yesoo au i o ke be akana kaningi ke Paskimoolooningi ke Maro tani in mulu tiap, le ilo ye lal yo Maro itaru be matan kala di tooltool ki ye i, in pombe. Ye kene tani in, ngan la be Maro ole ipatnaia Paskimoolooningi tani, in punu le iken mallangana pang nga.”

17Motong la ikaua ruku atu a iwete lo ponana ki pang Maro ye, inbe iyei ne, “Kakaua ruku i a ang le imot kasuketketi kataunu yang, inbe kayin ran ki nga kasin kasin. 18Awete pang nen, yesoo au i o ke be ayin ooroo surunu mulu tiap, le ilo ye lal yo Maro be matan kala di tooltool ki ye i.”

19Motong la Yesu ikaua porong atu a iwete lo ponana ki pang Maro ye, inbe itepalapala a ikap pang di galiunu tina, inbe iwete pang di nen, “Bi, i au medak la akauu pang i. Le ole kakani a be nen ngan lomim tutu matenge kiau ye.” 20Ngan tikana porong tani a imot, motong la itoo dada gaongo leu ye ruku. Le iwete nen, “Ooroo wain surunu yo iken ruku i lono nga, ngan rara kiau yo be apamede betanga medana paunu pang ye i. Ngan la le apatioo be nen a Maro ilonang ye. 21Bong kakamata! Tool yo be itarau la di koi kiau baedi i, in ya la amru amkan so gaongo ye kookoowoo ke kaningi so i. 22Ngan nen le Tool Moolmool ke Maro ole itoo dada tani yo muku ngan Maro iweta a itaru panga i. Bong barau, tool yo be itara Tool Moolmool ke Maro la di koi ki baedi i, in ole isolo masngana mai le masngana mai ki taunu.”

23Yesu di galiunu tina, ngan tilongo yo iwete nen nga, le nga di tapdi tipartortor nen, “Ai, in sei kiidi be iyeie dada nen i?”

Yesu Di Galiunu Tiparsu Ye Betanga Be Ole Sei Iyei Mai Pang Di I

24Motong la ye kene tani in Yesu di galiunu tina ngan di tapdi tiparsu ye betanga kataunu ye di, be ole sei tool iyei kuto mai a imuku pang di i. 25Le nga Yesu iwete pang di nen, “Ai, di tooltool kuto maimai ke di tooltool yo tipa ye rara kidi Yuda tiap nga, ngan tikodo le timede ye gurana kidi, inbe tidada di tooltool kidi podi. Inbe di tooltool tina yo gurana kidi mai le di diedi tiyepe parmadi nga, ngan di tapdi lodi be di tooltool tikiui di ye ‘Di Tooltool ke Maroro.’ 26Bong ang nga, kin kayei nen be. Le kumata tool atu kataunu yang lono be iyei tool mai le imuku pang nga, ngan ole ya taunu irautoo le idu meneng lopo yege ni, dawa ben tool kase yo taukan ene i. Inbe kumata le tool atu lono be iyei tool kuto mai a be matan kalang nga, ngan ole iyei ben kapraingi kiang. 27Nga be atorang, sei tool ene mai i, tool yo iwur ye kookoowoo ke kaningi so i, too tool yo iso kaningi a ikap la irai di tooltool yo tiwur ye kookoowoo ke kaningi so i? Ngan tool yo ene mai i, in tool tani yo iwur ye kookoowoo a be ikan so i. Bong au i nookoot ayang tayepe nga, ngan ayei dawa ben kapraingi kiang, a be nen ngan alonang. 28Muku ngan ayang tayepe, inbe moonoo matana matana la pompombe pang yau nga, bong ngan le kakoo yau tiap. 29Ngan nen le ben tina Tamak imalum pau le itarau be ayei tool kuto mai a matak kala so nga le imot nga, ngan la au lapau amalum pang le ole atarang be kayei tooltool kuto maimai nen lapau. 30Ngan nanga, kumata le pang dama ni be ayei tool kuto mai a matak kala so nga le imot nga, ngan ole ayang tawur le tawakaia kookoowoo kiau ke kaningi so a takan be tayin, inbe ole lo kawur ye kookoowoo ke burungu ke di tooltool kuto maimai, a be nen ngan matamim kala di rara ke Isrel yo sangaul be ru nga.”

Yesu Iwete Be Pita Ole Iwala Murini Panga

(Matiu 26:31-35; Maka 14:27-31; Yowan 13:36-38)

31Motong la Yesu iwete pang Simon nen, “Simon, Simon, kupalongo! Satan itor be ole itou ang atu atu ye lo medana kiang, dawa ben tool ke kapkingi be itaurai dingding patunu a be kulini ikoo ye kanono nga. 32Bong ngan Simon, au i apatarau yong oo, a be nen ngan lo medana kiong yo kutaru pau i, in ilene le ipa so be. Ngan nen le ye kene yo be kuportaka lom mulu pau ye in nga, ngan kupamede di diem kapala yo titara lodi medana pau nga, ngan lodi, a be nen ngan tikodo le timede lapau.”

33Motong la Pita iyei ne, “Tool Mai, au i araia lok be ole titaridi aru lo rumu dook tiap kidi talnga dikidiki lono, a be nen ngan aru le ru be tammata.”

34Motong la Yesu iraua betanga ke Pita nen, “Atoo, Pita! Awete pong nen, nookoot bong katai nga, ngan ole tareke itang tiao, inbe kupataukala a kuwete le patol be ong i lom galanga yau tiap.”

Yesu Iwete Be Di Galiunu Tikap Pul Ke Patokongo

35Motong la Yesu iwete pang di galiunu tina nen, “Ye kene yo awangang baemim koonoo a kala be la kayei urata kiau ye in nga, ngan le kakap touo depe ke tarungu pat, le depe ke lonloningi, inbe loningi ke kemim ngan sa a kala tiap. Bong kene tani in le kamaka ye so sa lapau, too tiap?”

Ngan le di galiunu tina tiyei ne, “Tiap.”

36Motong la iwete pang di nen, “Bong nookoot nga, tool be depe ki ke tarungu pat, ngan ikauu. Inbe tool be depe ki ke tarungu lonloningi nga, ngan ikauu lapau. Inbe kumata le tool be taukan pul ke patokongo nga, ngan ole iyawara sousoungu matolene ki, a be nen ngan ikap pat tina, inbe iyimi kan atu. 37Ngan awete pang nen, yesoo betanga yo tiwodo ilo ye Rau ke Maro nga, ngan iwete nen, ‘Di tooltool ole tikamata dawa ben ya in tool dook tiap atu.’ - Le ole tiyei dada nen pau, yesoo so tina le imot yo tiwodo betanga ki lo iken ye Rau ke Maro nga, ngan ole kanono pombe pang yau moolmool le imot.”

38Yesu iwete pang di nen, motong la di galiunu tina ngan tiyei ne, “Tool Mai, kumata! Am nga pul kiam ke patokongo ngan ru nanga la ikenen nga.”

Motong la iwete pang di nen, “Ngan dook mata.”

Yesu Ilo Pang Kawal Olip Be Lo Ipatarau

(Matiu 26:36-46; Maka 14:32-42)

39Motong la Yesu iyege malala mai tani, inbe ipa a ilo pang kawal Olip ben tina yo kanakana ngan iyei nga. Le nga di galiunu tina ngan titoo lapau a tiye tilo. 40Ngan tilo a lo pombe ye ni tani, motong la iwete pang di nen, “Ai, kapatarau, a nen ngan touanga sa be pombe pang yang nga, ngan o ke be kamol tiap.”

41Motong la iyege di galiunu tina, inbe ipa le ila manga mooloo kasin, dawa ben manga yo tool atu be ikat ye pat ngan le la pumbe ye i. Motong la du igun turunu, inbe ipatarau. Iyei ne, 42“Tamak, kumata le lom dook mata nga, ngan kugutaka ruku ke masngana i yau. Bong kin kutoo au lok be, kutoo ong taum lom leu.” 43Yesu ipatarau nen, motong la bangabangana atu ke Maro ipa ye malala ke Maro a isi pombe pang ye a ipamede. 44Ngan Yesu ya taunu ikanamaii ngan lon modoko inbe tinin moo mai san, le nga ipatarau le gurana. Inbe sapirana yo irar ye tinini mai i le imot a imol du tana nga, ngan dawa ben rara patunu.

45Yesu ipatarau a imot, motong la imadit a imulu a ila pang ye di galiunu tina. Ila, ngan ikamata di yo tiken mata koot nga, yesoo bong lo modoko mai irau di le guradi tiap. 46Motong la iwete pang di nen, “Ai, nga yelei a kaken mata nga? Kamadit a kapatarau, a nen ngan touanga sa be pombe pang yang nga, ngan o ke be kamol tiap.”

Di Tooltool Ke Patokongo Tiparama Yesu

(Matiu 26:47-56; Maka 14:43-50; Yowan 18:3-11)

47Yesu iwetewete nen go, inbe di tooltool malala mai tipa le lo pombe. Di tooltool tina ngan Yuta yo Yesu di galiunu tina yo sangaul be ru nga, ngan atu kidi i, in ya la irara di a tilo i. Le nga Yuta tani in ipa so le ila potai ye Yesu la iwarra, inbe isomo pangana. 48Motong la Yesu itoru nen, “Yuta, nga be kutara Tool Moolmool ke Maro la di koi ki baedi, la le se kusomo pangana nen nga, too?”

49Ye kene tani in yeisa be Yesu di galiunu tina ngan tikamata so tani yo be pombe pang ye in nga, le nga tiyei ne, “Tool Mai, nga lom belei, be amraumatamata di tooltool nga ye pul kiam ke patokongo nga, too?” 50Tiwete nen, motong la atu kidi iposo pul ki ke patokongo tina le itarakede kapraingi ke tool kuto mai ke paroranga so pang Maro, in talngana oonoo, le imakede.

51Bong ngan Yesu ikamata, le nga iyei ne, “Dookoot! Kin kuyei dada yo nen i, in mulu be.” Motong la Yesu itara baene ilo ye tool tani in talngana, ngan le talngana tani in dook mata mulu.

52Motong la Yesu iwete pang di tooltool maimai ke paroranga so pang Maro, tiye di tooltool kuto maimai yo matadi kala di bianga yo tikodo kala bareme mai ke sungunu nga, inbe di tooltool maimai kidi Yuda yo timan be man tikauu a tiparama nga, ngan nen. Iyei ne, “Ai, au i tool ke patokongo le pinnau la kakap pul le kai ke patokongo a kaman be man kaparamau nga, too? 53Ye ke kanakana ngan ayang tayepe koongoo lono ke bareme mai ke sungunu nga, ngan lomim be kakau au a kaparamau tiap. Bong dookoot, katai nga lal kiang, yesoo gurana ke todo in mai san, le idukang.”

Pita Iwete Be Ya In Lon Galanga Ye Yesu Tiap

(Matiu 26:57-58, 69-75; Maka 14:53-54, 66-72; Yowan 18:12-18, 25-27)

54Yesu iwete nen a imot, motong la tikauu a tiparama, inbe tikauu a tiye tidu. Ngan tidu, motong la tikauu a tipa so le tilo rumu lono ke tool kuto mai ke paroranga so pang Maro. Ngan le Pita lapau itoo di a ilo, bong le ipa ben manga mooloo kasin. 55Ilo, ngan di tooltool pattu tipata ei ke koongoo lono ke rumu tani, inbe sila tiwur gaongo a ei loo di. Le nga Pita ila la iye di tiwur. 56Motong la garup nene atu yo iyei kapraingi i, in ikamata Pita tani yo iwurur ei loloana tani in gigini nga, le nga matan kenen ye le ikamata dook, motong la iyei ne, “Ai, tool in ya lapau iye Yesu tiyepe.”

57Bong ngan Pita ipataukala, le nga iyei ne, “Atoo, garup, au i lok galanga ye tiap.”

58Ngan tiyepe le mooloo tiap, inbe tool san mulu ikamata Pita le nga la iyei ne, “Ai, ong lapau, ong i di tooltool tina yo iye di tiyepe nga, ngan atu la ong i.”

Bong Pita iyei ne, “Atoo, tool kiau, au i tiap.”

59Le nga tiyepe kasin mulu,+ motong la tool san mulu ikamata, le nga iwete katkat a iyei ne, “Moolmool sa, tool in ya lapau iye tiyepe, yesoo ya in tool ke Galili.”

60Bong Pita iyei ne, “Atoo, tool kiau, au i lok galanga ye betanga yo kuwetewete ye, ngan tiap!” Ngan iwetewete nen go, le tina pattu leu inbe tareke itang. 61Motong la Tool Mai iportak a matan kenen ye. Le nga Pita tani in lon tut betanga tina yo muku ngan iwete panga nga. Ngan Tool Mai iwete nen, “Nookoot bong katai nga, ngan ole tareke itang tiao, inbe kupataukala a kuwete le patol be ong i lom galanga yau tiap.” 62Ngan nen le Pita ikoo a idu ke diki du itang welewele.

Tipalele Sere Ye Yesu Inbe Tirauu

(Matiu 26:67-68; Maka 14:65)

63Di tooltool tina yo matadi kala Yesu nga, ngan tipalele sere ye, inbe tirauu. 64Motong la tipaukala matana ye wam, inbe titoru nen, “Oo, be ong i Maro koonoo moolmool nga, ngan kuwete too. I sei irau ong i?” 65Inbe di tooltool tina ngan tiwete betanga kapala yo dook tiap nga, ngan panga lapau.

Yesu Ilo Ikodo Dama Kidi Tooltool Kuto Maimai Kidi Yuda

(Matiu 26:59-66; Maka 14:55-64; Yowan 18:19-24)

66Ngan tiyepe a muntu le nga ke ise, motong la di kuto maimai kidi Yuda nga, ngan tiye di tooltool maimai ke paroranga so pang Maro, inbe di pannoongoo ke ger ke Maro nga, ngan di le imot timan tigaua. Motong la tikaua Yesu a lo ikodo dama kidi ye ni ke karatanga betanga, inbe tiyei ne, 67“Oo, kuwete pam ngan. Ong i Kirisi, tool tani yo Maro ipootoo be si ikap di tooltool ki a ipamulu di i, too tiap?” Motong la Yesu iraua betanga kidi nen, “Kumata le awete pang nga, ngan ang nga o ke be katara lomim medana ye betanga kiau tiap. 68Inbe kumata le be atorang ye betanga sa nga, ngan o ke be karaua betanga kiau tani, in tiap lapau. 69Bong awete pang nen, nookoot katai a ilo nga, ngan ole Tool Moolmool ke Maro iwur ye Maro yo gurana ki mai mata i, in baene oonoo.”

70Yesu iwete nen, motong la di tooltool maimai tina ngan di le imot titoru nen, “Ai, ngan nen le ong i o Maro Natunu, too?”

Motong la iraua betanga kidi nen, “Ang tapmim be kawete nen nga, ngan dook mata. I au tani naii.”

71Motong la di tooltool tina ngan tiyei ne, “Imot oo! Nga be tasere di tooltool sa mulu be man tipaposi paidi pang soo? Nookoot nga iwete a ipaposi ye betanga ki a talongo oo.”

Rau Ke Maro

© Wycliffe Bible Translators, Inc. All rights reserved

More Info | Version Index