Ecrã de busca

Luka 19

Yesu Ilo Rumu Ke Sakias

1Yesu ipa a ilo pombe malala mai Yeriko, le nga be itoo dada a ipa so a ila. 2Ngan tool kuto mai atu ke sodaningi pat yo ene Sakias i, in iyepe ye malala mai tani in. Bong ya in tool ballingana lapau. 3Ngan Sakias tani in lono be le ikamata Yesu pa, a nen ngan be ikilla. Bong ngan kene moddono mata le ke be ikamata Yesu tiap, yesoo di tooltool malala mai san la tiye Yesu tipa le tigaliuu nga. 4Le nga Sakias tani in idada a imuku le ilo ke dama ye dada yo Yesu be ipa ye a ila i, inbe irookoo kai somai atu le lo iyepe kaini, a nen ngan Yesu be itoo dada tani in a ila nga, ngan ikamata.

5Le nga Yesu itoo dada tani in a ila le la itarke ni tani, inbe itada pang ete, ngan ikamata Sakias tani, le nga iwete panga nen, “Sakias, palbe be kupa tarai a kusi tana! Nookoot katai nga ole ayepe ye rumu kiong.” 6Sakias ilongo nen, le tina lon ponana kaiye. Le nga irookoo tarai a idu tana, motong la ikaua Yesu a yaru tila pang rumu ki.

7Ngan di tooltool tina le imot tikamata Yesu yo lo iyepe ye rumu ke Sakias nga, le nga tikap malmal panga a tiwete mur ye. Tiyei ne, “Ona tiap! Nga yelei a be lo iyepe ye rumu ke tool dook tiap ke noonoo ni nga?”

8Motong la Sakias tani in imadit le lo ikodo, inbe iwete pang Tool Mai Yesu nen, “Tool Mai, kupalongo! Nookoot katai nga ole apoto so kiau le paru, lo ngan be akap kapala pang di tooltool yo ballingadi tiap nga. Inbe kumata le akaua lungunu ye tool atu be akap sokorai so ki nga, ngan ole araua so ki tina, inbe ikap so pai mulu panga ye so ki tina ngan kootoonoo.”

9Motong la Yesu iwete panga nen, “Nookoot katai nga ole Maro ipamulong kuye di tooltool le imot yo kuye di kayepe ye rumu i nga, ngan ye so dook tiap tani yo be igarungang i, yesoo ong i kutara lom medana panga, le ong i ben sasa ke Apram moolmool nga. 10Ngan awete nen, yesoo Tool Moolmool ke Maro isi tana i nga, ngan be si isere di tooltool yo tilledi nga, a nen ngan ikap di a ipamulu di ye so dook tiap yo be igarung di i.”

Yesu Ikatte Betanga Ye Di Tooltool Sangaul Atu

(Matiu 25:14-30)

11Di tooltool malala mai tina yo tigaua nga, ngan titar talngadi a tilongo betanga ke Yesu yo iwetewete nga. Ngan tina Yesu ipa a ilo potai pang ye malala mai Yerusalem nga, ngan le di tooltool tina tiyeisa lal yo Maro itaru be matan kala di tooltool ki ye i, in la o iman potai koot i. 12Ngan nen le Yesu ikatte betanga atu pang di nen, “Tool mai atu, in nga be idu pang ye tana mai atu yo iken ni mooloo i, ngan idu be du titaru a iyei tool kuto mai yo be matan kala di tooltool ki, lo ngan be imulu a ilong pang ye malala ki kooti. 13Le nga ye kene yo be imadit a ipa ye in nga, ngan ikiu di kapraingi ki yo sangaul atu nga, ngan man tigaua. Motong la ikap pat yo ene gol + ngan sangaul a imalimi di atu atu ye, inbe iwete pang di nen, ‘Pat yo akap pang koot nga, ngan be la kayei urata ke kaungu pat ye le le amulu a along.’

14“Bong ngan tool mai tani in di tooltool ke malala lono ki, lodi dook mata panga tiap. Le nga ipa a imuku, motong la tiwanga di tooltool kidi pattu a titoo be du tiwete pang di tooltool maimai ke tana mai tani yo be idu ye in nen. Tiyei ne, ‘Am nga lomam be katara tool in a iyei kuto mai pam, inbe matan kalam tiap.’

15“Bong ngan di tooltool maimai ke tana mai tani in lodi be tilongo betanga kidi tooltool tina tiap. Le nga titara tool tani a be iyei tool kuto mai pang di, motong la imulu a ilong pang malala ki nga. Ilong, motong la iwanga pang di kapraingi ki tina yo muku ngan ikap pat pang di nga, ngan be timan. Ya in lono be itor tomonai di ye pat ki tina yo ikap pang di nga, ngan tiyei urata ke kaungu pat ye, a nen ngan tikap sa mulu la ye lapau, too tiap?

16“Le nga kapraingi ki yo iman muku i, in iman le man iyei ne, ‘Tool mai, au i ayei urata ye pat kiong tani yo kouu pau i, ngan le akap pat sangaul atu mulu la ilo pono nga.’

17“Motong la tool kuto mai tani in iyei ne, ‘Ona, ong i kapraingi dook mata! Ong in kuyei urata dook mata ye so mitiap tani yo akauu pong i, ngan le matam kala dook mata san. Ngan nanga, ole atarong be kuyei tool mai atu a be nen ngan matam kala malala maimai sangaul atu.’

18“Motong la kapraingi san yo itoo i, in iman le man iyei ne, ‘Tool mai, au i ayei urata ye pat kiong tani yo kouu pau i, ngan le akap pat limi mulu la ilo pono nga.’

19“Le nga tool kuto mai tani in iwete panga nen, ‘Dook mata, ole atarong be kuyei tool mai atu a be nen ngan matam kala malala maimai limi.’

20“Motong la kapraingi tina ngan san mulu iman le man iyei ne, ‘Tool mai, pat kiong tani yo kouu pau i, in bi. Kumata nga, aduku ye wam, motong la atarkoo dook mata a iken nga, 21yesoo ong i tool gadagadam le au i atattadai ong. Kanakana ngan ong i kop sokorai pat kidi diem yo titar nga, inbe kugamagama kaningi ke kumu yo di diem tikapki, ngan lapau.’

22“Motong la tool kuto mai tani in iwete panga nen, ‘Ona, ong i kapraingi dook tiap sa! Betanga kiong yo nookoot ong taum kuwete nga, ngan ipaposong ye urata dook tiap kiong oo. Le ole ayemenai ong ye. Yesoo, ong i lom galanga yau be au i tool gadagadak, inbe kanakana ngan au i akap sokorai pat kidi diek yo titar nga, inbe agamagama kaningi ke kumu yo di diek tikapki, ngan lapau. 23Le be nen nga, ngan yelei a kutara pat kiau i ilo ye rumu ke tarungu pat, tiap nga? Kumata be kuyei nen nga, ngan la be pat kiau tani idik mulu pang ete, a be nen ngan amulu a along nga, ngan akaua pat kiau tani le ipa ye pat yo be titar ilo pono mulu nga.’

24“Motong la tool kuto mai tani in iwete pang di tooltool yo tikodo potai pang ye ngan nen, ‘Kakaua pat in ye tool in, inbe kakauu pang tool yo pat ki sangaul atu i.’

25“Ngan di tooltool tina ngan tiyei ne, ‘Tool mai, ngan dook mata, bong tool ni pat yo ikap koot ngo sangaul atu oo!’

26“Motong la tool kuto mai tani in iyei ne, ‘Awete pang nen, di tooltool yo so kidi nga, ngan ole akap so sa mulu pang di. Bong tool yo taukan so i, in so kasin yo be ikap nga, ngan ole akap ye. 27Bong di koi kiau yo lodi be ayei tool kuto mai a matak kala di tiap nga, ngan kakap di le timan matak i, inbe man karaumatamata di le imot a timmata.’ ”

28Yesu ikatte betanga nen pang di a imot, motong la imadit ye panga mulu a itoo dada be ilo pang Yerusalem nga.

Yesu Lo Pombe Yerusalem Ngan Di Tooltool Tiyitmaka Ene Ben Ya In Tool Kuto Mai Atu

(Matiu 21:1-11; Maka 11:1-11; Yowan 12:12-19)

29Yesu iye di galiunu titoo dada a be tilo pang malala mai Yerusalem nga, ngan tipa le tilo potai ye malala Betpage inbe Betani yo iken ye kawal yo ene Olip in madini nga. Motong la Yesu iwanga di galiunu tina ngan ru, 30inbe iwete pang di nen, “Angru kamuku a kalo ye malala yo iken pang dama i. Ngan kumata be kapa le lo pombe nga, ngan ole kakamata asara ke solanga di tooltool yo ene donki i, in kase paunu atu yo tiwatu i. Ngan donki tani in tool sa iwur pono a idada ye pitiao. Lo ngan be angru karu ooroo ki, inbe kadede a kasi. 31Le kumata be tool sa ikamatang le itorang nen, ‘Ai, nga yelei a karu ooroo ke donki in nga?’ ngan kawete panga nen, ‘Tool Mai be iyei urata ki ye ngan.’ ”

32Motong la di galiunu ru tina yo iwanga di nga, ngan timuku a tilo ngan le lo yaru tikamata so dawa ben tina yo Yesu iwete pang di ye nga. 33Motong la yaru be tiru ooroo ke donki natunu tani, ngan di taunu tikamata di le nga titor di nen, “Ai, nga yelei a be angru karu ooroo ke donki natunu in nga?”

34Ngan tiyei ne, “Tool Mai be iyei urata ki ye ngan.”

35Motong la yaru tidede donki tani in a tidu pang ye Yesu. Tidu, motong la tidur sousoungu matolene kidi ngan a tiyoo lo donki tani in pono, inbe tiyiti Yesu lo iwur ye. 36Motong la yeisa be donki tani isola a be itoo dada a ilo, ngan le di tooltool kapala yo tiye tipa nga, ngan tidur sousoungu matolene kidi lapau a tiyoo du dada katene ye ni yo be ipa ye a ilo i.

37Ngan ise potai pang ye ni yo dada ki ipa ke kawal Olip a be idu i, motong Yesu di galiunu malala mai tina yo titoo nga, ngan lodi ponana a tiyitmaka Maro ene, yesoo ye mos tina le imot yo Yesu iyei a tikamata ye matadi koot nga. Le nga koodi le mai nen,

38“Maro ole iyei urata dook mata pang ye tool kuto mai yo isi ye Tool Mai ene i.-

Maro yo iyepe ye malala ki ete ni, in iyei idi tooltool le imot le tayepe ye lo silene ki.

Le tayeie ene le ilo ete ke be di tooltool tipayiti ye!”

39Bong ngan di Paresi pattu yo tipa kataunu ye di tooltool malala mai tina ngan tilongo yo koodi nen nga, le nga tiwete pang Yesu. Tiyei ne, “Pannoongoo, kulele di galium nga a koodi dookoot!”

40Motong la Yesu iraua betanga kidi nen, “Awete pang nen, kumata le be alele di nga, ngan ole pat nga di tapdi la be koodi a tiyitmaka Maro ene nga.”

Yesu Itang Ye Yerusalem

41Yesu ipa a ilo potai pang Yerusalem, ngan ikamata, le nga itang ye. 42Inbe iwete nen, “Atoo, Yerusalem, nookoot katai nga, ngan au i lok be di tooltool kiong lodi galanga dook ye so yo be iyei di le tiyepe ye lo silene dook mata i. Bong so tina ngan iken mallangana tiap, le o ke be lodi galanga ye tiap. 43Atoo, Yerusalem, ngan pang dama ni nga, ngan lal dook tiap atu yo be pombe pang yong nga, ngan ole di koi kiong timan a man tiwudu tana le iwakaia koongoo kiong i. Inbe ole tikodo kalakalong ye gigim tina nga le imot a tigaliu ong le tiparkat. 44Ngan ole man tisorroko koongoo kiong du tana, inbe lo tiraumatamata di tooltool kiong yo tiyepe koongoo lono nga. Ngan o ke be tiyege pat kiong sa a iloko lo ene san pono, ngan tiap, yesoo bong kukilala tool yo Maro iwanga be isi ipamulong ye so yo be igarungong i, in tiap.”

Yesu Inganga Di Tooltool Ye Bareme Mai Ke Sungunu Lono

(Matiu 21:12-17; Maka 11:15-19; Yowan 2:13-22)

45Yesu ilo pombe Yerusalem, motong la ipa so a ilo koongoo lono ke bareme mai ke sungunu nga, ngan ikamata di tooltool yo tiyawar so kidi koongoo lono nga. Le nga inganga di, 46inbe iwete pang di nen, “Betanga yo tiwodo lo iken ye Rau ke Maro nga, ngan iwete nen, ‘Rumu kiau i, in rumu ke pataraungu.’ - Bong ang nga kayeii le iyei ben ‘ni kidi tooltool ke pinnau be tiko ye.’ -

47Ngan ye ke kanakana nga, ngan Yesu lo ipatomonai di tooltool koongoo lono ke bareme mai ke sungunu tani. Bong ngan di tooltool maimai ke paroranga so pang Maro nga, ngan tiye di pannoongoo ke ger ke Maro, inbe di tooltool maimai kapala kidi Yuda nga, ngan tikapye be tisere dada yo be tiraumata Yesu tani ye a imata i. 48Bong ngan tikamata di tooltool yo talngadi gorengana be tilongo betanga ki nga, ngan nen le ke be tiyeie so sa panga tiap.

Rau Ke Maro

© Wycliffe Bible Translators, Inc. All rights reserved

More Info | Version Index