Ecrã de busca

Matiu 2

ꞌIraau Sae Madoma Baaniai Dora Na Araꞌa Iei Sina

1ꞌIa Jisas ꞌa huta naꞌi Betlehem, ꞌe ꞌomaa naꞌi Provensi Jiudea ꞌoha na mwaeraha Herod. Aiꞌa orea mau ma raꞌi sae madoma ra boi baaniai dora na araꞌa iei sina ra ada naꞌi Jerusalem 2mara heisongaꞌi oꞌani, “Naꞌi hei na huta iei mwaeraha adaaui Jiu? Meu reꞌiai heeꞌu naꞌi dora na araꞌa iei sina na haꞌataꞌiniai huta ana, mameu boi ꞌanai haꞌarahesia.”

3Naꞌi ꞌoha ꞌia Herod ꞌa rongoa oꞌasi, ꞌa taꞌaa diꞌu i ꞌadomaꞌina, beiraau roꞌu hakoi sae naꞌi Jerusalem. 4Ma ꞌunu goniraau mai Naꞌohadaaꞌi Piriisi mana Haꞌausuri ꞌanai Ringe anaꞌia Moses maagu songaꞌiniraau oꞌani, “Naꞌi hei nai huta iei Haꞌatahi?”

5Miraau oꞌani, “Naꞌi Betlehem naꞌi Provensi Jiudea. ꞌInia naasi maho na ꞌia God na ꞌunua naꞌi ngoonai Rarabea oꞌani,

6‘Betlehem, ꞌo ororiu diꞌu naꞌi Jiudea,

ꞌinia baaniꞌo nai huraꞌa mai mwaeraha

nai marungiraaui noni aguꞌi, ꞌiraau Israel.’ ”+

7Mia Herod ꞌa ꞌunuraau girugiru moi sae madoma magu songaꞌiniraau ꞌiniai ꞌoha heꞌua narau tahamora reꞌiai heeꞌu. 8ꞌA oꞌani ꞌiniraau maagu haꞌa-taariraau wou, “Moi ꞌari Betlehem mamoi sibaniai garesi. ꞌOha moi sadoia, moi ahoꞌi mai ꞌini ꞌanai haꞌarangasia tanaau mawaigu ꞌari roꞌu wou ꞌanai haꞌarahesia.”

9Marau ꞌari, rau reꞌia roꞌu mau taꞌi heeꞌu narau reꞌia gaꞌu ani, ꞌa naꞌotaradaau. ꞌAgu papaku naꞌi ahoranai dora na awa iei gare. 10Rau waꞌewaꞌe raha diꞌu ꞌoha rau reꞌiai heeꞌu. 11Rau siri ruma marau reꞌiai gare beia inana ꞌia Meri. Rau topiraꞌi ruru marau haꞌarahesia. Rau rahiꞌi huraꞌa i bane adaaꞌi marau banea tanaa i gol mana rua mareho siꞌini goro nara ꞌunua ꞌinia franginsens mana myrrh. 12Naꞌi muri, ꞌia God ꞌa haꞌabasuraau naꞌi mauru do rai abu ahoꞌi ꞌari beia Herod. Miraau ahoꞌi wou naꞌi ꞌomaa adaau naꞌi tara heꞌeteꞌi.

ꞌIa Josep Mia Meri Raru Hora Beiai Gare ꞌAri Ijip

13Murinai ahoꞌi adaaui sae madoma, ꞌe enjel ana Araha God ꞌa haꞌamaranga tanaa Josep naꞌi mauru. ꞌA oꞌani ꞌinia, “Josep, ꞌoi rarai maꞌoi waiai gare mia inana mamoi hora ꞌari Ijip, ꞌinia Herod ꞌai sibaniai gare ꞌanai haꞌamaesia. Moi awa ꞌisi tari ꞌoha wai ꞌunua tanaꞌo do moi ahoꞌi mai ꞌini.”

14Mia Josep ꞌa rarai ma waiai gare mia inana naꞌi rodosi marau hano ꞌanai Ijip. 15Rau awa ꞌisi tari ꞌoha na mae a Herod. Rau haua oꞌasi ꞌanai haꞌatoꞌoa haꞌa-momori taha na ꞌunua Araha God naꞌi ngoonai Rarabea oꞌani, “ꞌAu ꞌunua huraꞌa i gare agua baaniai Ijip.”+

Ra Ngahu Haꞌamaesiraaui Mwani Garemwane

16ꞌOha ꞌia Herod ꞌa sadoia do ꞌiraaui sae madoma rau pwariꞌiaꞌa, ꞌa taesuꞌa diꞌu i ahuna, ma atengaꞌinia dorai ngahu haꞌamaesiꞌi hako mwane garemwane naꞌi Betlehem, taraawaꞌa naꞌi rua harisi ma dio, mana garemwane suriꞌi roꞌu i ꞌomaa gaarangiai Betlehem. ꞌIa Herod ꞌa haua oꞌasi suria ꞌiraaui sae madoma rau ꞌunua do ꞌe rua harisi na bwane hako murinai haꞌataꞌi na haa i heeꞌusi. 17Naꞌi ꞌoha na haua oꞌasi a Herod, ꞌa toꞌo haꞌa-momoriꞌa i taha na ꞌunua Rarabea Jeremaea na oꞌani,

18“ꞌE angi uru-uru ra rongoa naꞌi ꞌomaai Ramaa. ꞌIa Resel ꞌa angisiraaui gare anaꞌi ma aiꞌa ꞌirisia dorai haꞌa-aroahuna, ꞌinia ꞌiraaui gare anaꞌi ra maeꞌa.”+

Ra Waia Ahoꞌi a Jisas Baaniai Ijip ꞌAri Nasaret

19Murinai mae ana Herod, ꞌe enjel ana Araha God ꞌa haꞌataꞌi tanaa Josep naꞌi mauru naꞌi Ijip. 20ꞌA oꞌani ꞌinia, “ꞌOi rarai maꞌoi waiai gare mia inana mamoi ahoꞌi ꞌari Israel. ꞌInia ꞌiraaui nei ra sibania ꞌanai haꞌamaesia ra maeꞌa.”

21Mia Josep ꞌa rarai ma waiai gare mia inana marau ahoꞌi ꞌari Israel. 22Naꞌi ꞌoha na ꞌia Josep ꞌa rongoa do ꞌia Akeleas ꞌa mwaeraha orisia amana ꞌia Herod naꞌi Provensi Jiudea, ꞌa mamaaꞌutaꞌi ahoꞌi ꞌari Jiudea. Mana nata maho na ꞌomesia roꞌu naꞌi nata mauru, ra ꞌunua wetewete tanaa doꞌai ꞌari Provensi Galili. 23Naasi rau ꞌari marau awa naꞌi Nasaret ma haꞌa-momoriꞌa i taha nara ꞌunua i Rarabea oꞌani, “Rai ꞌunua ꞌiniai ai Nasaret.”

Taroha Goro Mana Usuusu Maea

© Wycliffe Bible Translators, Inc. All rights reserved.

More Info | Version Index